Idols terug op TV, maar vir hoe lank?
2010-01-08 15:49
Los Angeles – Die gewilde TV-reeks American Idol se negende seisoen, met komediant Ellen DeGeneres as een van die beoordelaars, is volgende week op TV te sien.
Die vraag bly egter staan of die toekoms van die reeks en sy grootste ster, bitterbek Britse beoordelaar Simon Cowell, verseker is.
Ten spyte van laer kykersgetalle die afgelope drie jaar, is meeste industriekenners vol hoop dat die gewilde sangkompetisie steeds die geld vir die TV-netwerk FOX sal laat inrol.
Gerugte dat Cowell sal uittree as beoordelaar wanneer sy kontrak in Mei eindig, asook die feit dat voormalige beoordelaar Paula Abdul met DeGeneres vervang word, sal waarskynlik ook belangstelling in die reeks se eerste episode op 12 Januarie ’n hupstootjie gee.
Ondanks jare se gewildheid onder kykers en groot bedrae deur adverteerders betaal, staar die reeks steeds 'n kritieke jaar in die gesig.
Volgens TNS Media Intelligence het kykersgetalle vanaf ’n hoogtepunt van 30,8 miljoen kykers per episode in 2006, na ’n gemiddelde 26.3 miljoen per episode in 2009, gedaal. Advertensieverkope het ook van $903,3 miljoen (sowat R6,7 miljard) na $858,6 miljoen (sowat R6,35 miljard) gesak.
“Dit is raar dat ’n popkultuurfenomeen hierdie soort momentum kan behou, en jaar na jaar sulke groot kykersgetalle kan trek. So dit is natuurlik om te vra wanneer die borrel gaan bars," het Entertainment Weekly se Michael Slezak gesê.
“Ek dink nie ons is al daar nie. Die reeks kan nog ’n lekker hou (dws. ’n daling in kykergetalle) vat en steeds bo aan die lys wees. Maak nie saak waar Idols op die lys land nie, ek’s seker die getalle kan al Fox se kompetisie jaloers maak,” het Slezak gesê.
–Reuters