Zuma dreig wéér met voorvaders

2011-05-13 23:01

Port Elizabeth - Die voorvaders sal ontsteld wees as die ANC in die plaaslike verkiesings van 18 Mei beheer oor die Nelson Mandelabaai-metropool verloor, het pres. Jacob Zuma Vrydag gesê.

"Die voorvaders sal ontsteld wees as Nelson Mandelabaai verlore gaan, want hierdie is die tuiste van die ANC," het Zuma aan sowat 25 000 toeskouers by die Dan Qeqe-stadion gesê.

Dié uitlating volg kort ná 'n soortgelyke uitspraak in Lichtenburg op Donderdag, toe Zuma gesê het die voorvaders sal teen kiesers draai wat die ANC verlaat.

Zuma, wat deur Cosatu se sekretaris-generaal Zwelinzima Vavi vergesel is, is met sy aankoms met 'n gesing en gedans begroet.

Zuma het vroeër gesê daar was tydens die algemene verkiesing in 2009 'n debat oor die moontlikheid dat Cope dié metropool by die ANC sou afneem, maar dat dit nooit gebeur het nie.

"Hierdie is die tuiste van die ANC. Niemand gaan die ANC vat nie en niemand voel bedreig nie," het hy gesê.

Zuma het voor die byeenkoms 'n nuwe rolstoel aan 'n vrou oorhandig wat hy op 'n vorige besoek aan Zwide ontmoet het. Sy het gekla dat sy haar vorige rolstoel nie behoorlik kon beheer nie. Zuma het destyds belowe hy sal terugkeer met 'n nuwe rolstoel.

Zuma se besoek aan die metropool kom te midde algemene ongelukkigheid in die Oos-Kaapse ANC oor die party se lys burgemeesters- en wykskandidate vir die verkiesings.

- Volg Nuus24 op Twitter.

- SAPA