Zille ‘verheug’ oor Wes-Kaap
2011-05-20 07:12
Pretoria - Die Wes-Kaap behoort feitlik aan die DA nadat die party sy steunbasis in die afgelope plaaslike verkiesing met meer as 20 persentasiepunte vergroot het.
Hoewel die finale stemsyfers teen druktyd gisteraand nog nie beskikbaar was nie, was dit reeds duidelik dat DA-steun in die provinsie van 39,7% in die 2006- plaaslike verkiesings tot nagenoeg 60% geklim het.
Die syfer kan selfs hoër wees omdat heelwat van die uitslae in die Kaapse metrogebied nog uitstaande was.
Kiesersopkoms was vanjaar aansienlik hoër as in die vorige plaaslike verkiesing in 2006 en het die Onafhankike Verkiesingskommissie se mikpunt van 40% verreweg oorskry.
Die grootste stempersentasie was in die Wes-Kaap op nagenoeg 65%, gevolg deur die Noord-Kaap se 63%. Limpopo het die laagste kiesersopkoms gehad met stempersentasie van sowat 50%.
Vroeë aanduidings wys dat die DA die Moederstad met meer as 60,8%-steun sal verower. Die DA het voorts betekenisvolle vooruitgang gemaak in woongebiede soos die Bo-Kaap, Atlantis, Gatesville en Rylands Estate, waar die ANC in die verlede hoogty gevier het.
’n Uitgeputte Helen Zille, Wes-Kaapse premier en nasionale DA-leier, het gisteraand aan Die Burger gesê sy is verheug. “Die uitslae wys ons verkiesingstrategie in die Wes-Kaap het gewérk – al het dit met ’n wankelrige koalisieregering in Kaapstad begin.”
In die Drakenstein-munisipaliteit (Paarl) het die DA 58,6% van stemme verower en 55% daarvan in die Breedevallei (Worcester). In die Eikestad het die DA koning gekraai en teen druktyd het die party 61,2% van die stemme in die Stellenbosch-munisipaliteit gewen, berig Malani Venter.
Volgens Bokkie Geyer, DA-LP vir die Stellenbosse munisipale distrik, het die DA die ANC met ’n meerderheidstem in 17 van die 22 wyke “verpletter”. Die ANC het op sy beurt die meeste stemme in ’n deel van Lamot en Groendal by Franschhoek en die hele Khayamandi verwerf. Die DA was veral verras oor sy oorwinning in die woonbuurte Klapmuts, Cloetesville en Idasvallei.
In die Suid-Kaap swaai die DA in minstens drie Suid-Kaapse munisipaliteite die septer, berig Eugene Gunning. Die DA het die mag in George en Mosselbaai behou en in Knysna het hy die eerste keer in tien jaar ’n volstrekte meerderheid behaal. In die Hessequa-munisipaliteit (Riversdal) is die kans goed dat die DA ook deel van die regering sal wees nadat hy sewe setels verower het en hy kan moontlik met Cope, wat een setel gewen het, saamwerk.
In Bitou (Plettenbergbaai), wat die DA as die mins oorwonne munisipaliteit beskou het, het die DA die ANC net-net geklop met 48% van die stemme teenoor die ANC se 45,75%.
Beaufort-Wes was die enigste dorp waar die ANC ’n volstrekte meerderheid behaal het. Dit baan die weg vir die omstrede Truman Prince om weer die burgemeester van dié dorp te word, berig Tisha Steyn.
Jessie Duarte, ANC-woordvoerder, het gesê die ANC is tevrede met sy vertoning ten spyte van die DA se stewige groei in die Wes-Kaap. “Ons bruin gemeenskappe is ontsettend gemarginaliseer. Die ANC sal alles in die stryd werp om daardie gaping te oorbrug.”
- Die Burger