Verkiesing 'n grote vir ANC, sê analis
2011-05-18 10:54
Kaapstad - Die uitslag van Woensdag se plaaslike verkiesings is vir die ANC van deurslaggewende belang ná dié party in die nasionale verkiesing van 2009 swakker gevaar het, het prof. Susan Booysen, 'n analis verbonde aan die Universiteit van die Witwatersrand, gesê.
Die uitslag sal ook 'n aanduiding gee van hoe pres. Jacob Zuma as president vaar ná hy in 2007 gekies is om Thabo Mbeki op te volg.
"As hierdie die tweede agtereenvolgende verkiesing gaan wees waarin die ANC slegter vaar is dit moeilik om te sien hoe daardie neiging omgekeer gaan word," het sy gesê.
Volgens Booysen het interne ANC-politiek in die aanloop tot dié verkiesing 'n groot rol gespeel.
"Hierdie verkiesing gaan tot 'n groot mate oor hoe die ANC sy interne probleme bestuur... die lys van probleme word langer en beïnvloed hierdie verkiesings."
Zuma het erken dat daar probleme was met die aanwysing van wykskandidate, en het beloof dat 'n taakspan aangestel sal word om te bepaal of kandidate korrek aangewys is.
Booysen het gesê met dié proses behoort daar ook na die ANC se streeks- en priovinsiale leierskap gekyk te word.
"Onthou, hulle kies later vanjaar nuwe provinsiale leiers en dan volg die volgende nasionale (ANC-) verkiesing in Mangaung (Bloemfontein) volgende jaar, so daar is baie op die spel vir baie van hierdie leierskapstrukture," het sy gesê.
Sy het erken dat kiesers Woensdag hoofsaaklik sal kies tussen die ANC en die amptelike opposisie, die DA.
- Volg Nuus24 op Twitter.
- SAPA