Vavi moontlik toekomstige president
2011-04-10 09:29
Suné Kitshoff en Llewellyn Prince
Zwelinzima Vavi, sekretaris-generaal van Cosatu, word dalk geposisioneer as moontlike toekomstige president van Suid-Afrika.
“Die uitlatings wat Vavi toenemend maak, is ’n strategie, en mense moenie daardeur geflous word en dink Vavi maak homself ongewild onder sy alliansievennote nie,” het ’n bron na aan die ontwerp van die strategie aan Rapport gesê.
“Vavi word gesien as ’n uitskieter, en om hom gereeld in die media te sien en om sy sterk standpunte oor etiese optrede en waardes te hoor, is ’n vooropgestelde plan om die man onder ons mense as leier voorop te stel. Hulle moet gewoond raak aan hom, al hoe nader aan die presidensie,” sê die bron.
Vavi het die afgelope week met sy nuutste uitlatings oor ’n moontlike toekomstige “pres. Zille” wyd opspraak verwek.
Hy het die bedingingsraad van Numsa, die metaalwerkersvakbond, Dinsdag in Johannesburg toegespreek, en toe ’n paar nuwe knuppels in die alliansie se hoenderhok gegooi.
Hy het te velde getrek teen die werksverliese en armoede waarin Suid-Afrikaners onder die huidige regering gedompel is. Toe skok hy almal en sê daar word dalk binnekort na ’n pres. Zille verwys.
Ander meen hiermee het Vavi ’n erkenning gedoen en gesê wat die ANC tot dusver nog nie wou nie: Die sogenaamde “blou gevaar” is ’n waardige alternatief.
Aubrey Matshiqi, ’n politieke ontleder, sê wat Vavi eintlik met sy “pres. Zille”-uitlating bedoel, is dat die ANC in die toekoms verkiesings teen die DA kan verloor as hy by sy huidige beleidsrigting bly.
“Dit is egter ook ’n teken dat Vavi of Cosatu dink die DA is besig om te ontwikkel in ’n geloofwaardige opposisieparty.”
Prof. Dirk Kotzé, politieke ontleder aan Unisa, meen Vavi het sy alliansievennote (die regering) doelbewus probeer skok, en gemaan dat, sou hulle nie hul huis in orde kry en meer eties optree nie, ’n DA-regering nie ’n onmoontlike scenario in die toekoms is nie.
“Die plaaslike verkiesing op 18 Mei is in werklikheid ’n ANC vs. DA-verkiesing. Vavi sê eintlik vir sy vennote, pasop, die DA is ’n ‘blou gevaar’,” sê Kotzé.
Die ANC-jeugliga verwerp egter Vavi se siening.
Floyd Shivambu, jeugliga-woordvoerder, sê Vavi se “president Zille”-uitlating is lagwekkend, “want Helen Zille sal nooit president van Suid-Afrika wees nie, selfs al sak die son in ’n ander rigting”.
Vavi het die afgelope twee jaar gereeld die regering se beleidsrigtings aangevat: oor swart ekonomiese bemagtiging, die hiëna-staat en ministers wat in hul duur motors rondry terwyl mense honger ly.
Vavi het reeds aangedui hy is nie weer beskikbaar as sekretaris-generaal van Cosatu nie. Dié besluit sal die pad vir hom oopmaak om verkies te word tot die nasionale uitvoerende komitee van die ANC in Bloemfontein volgende jaar.
Patrick Craven, Cosatu-woordvoerder, sê Vavi verkies om nie kommentaar te lewer nie.
- Volg Nuus24 op Twitter.
- Rapport