Ster van advertensie 'verkoop leuens' – ANC
2011-05-14 19:22
Johannesburg - Die ster van 'n televisie-advertensie deur die DA wat gemik is op volgende week se plaaslike verkiesings is betaal "om leuens te verkoop," het die ANC Saterdag gesê.
"In die advertensie misbruik die party 'n weerlose, arme gemeenskapslid, Ntombikayise Lugalo, om leuens onder Suid-Afrikaners te verkoop dat die DA elektrisiteit aan haar huis voorsien het," het Jackson Mthembu, ANC-woordvoerder, in 'n verklaring gesê.
Volgens Mthembu is daar nie, soos in die advertensie geïmpliseer word, elektrisiteit na die vrou se huis aangelê nie, en dat sy steeds kerse en paraffien gebruik.
"Omdat die party te staan gekom het voor 'n verleentheid wat vloei uit hierdie fiktiewe advertensie, het die DA vinnig onwettige elektrisiteit na Lugalo se krothuisie aangelê," het Mthembu gesê.
"Enige dienslewering wat in Tambo-plein plaasgevind het, insluitend die verskaffing van elektrisiteit, het plaasgevind terwyl die ANC aan bewind was."
- Volg Nuus24 op Twitter.
- SAPA
