Premier wag vir TV voordat hy stem
2011-05-19 09:06
Parys - Die Vrystaatse premier wou Woensdag nie sy kruisie trek voordat die SABC opgedaag het om dié “reg” in beeld vas te vang nie.
Ace Magashule, geklee in ’n geel T-hemp met ’n afbeelding van pres. Jacob Zuma se laggende gesig daarop, is Woensdag in die woongebied Tumahole op sy tuisdorp, Parys, soos ’n held ontvang.
Dié “seun van Parys” is met sang en toejuiging deur ANC-ondersteuners by die Mosepedi-saal verwelkom.
Hy het met jonk en oud geselsies aangeknoop en selfs ’n drukkie of twee uitgedeel.
Dié saal in die hartjie van Tumahole het as ’n stemlokaal gedien.
Lang rye kiesers het vroegoggend voor die saal gestaan, maar het gou verminder.
Minstens tien mense het in die ry gestaan toe Magashule daar opgedaag het om te kom stem.
Hy het nie in die ry gestaan nie, maar, soos dit volgens protokol hoort, voorkeurbehandeling gekry.
Binne die stemlokaal het Jonas Ramokhoase, uitvoerende burgemeester van die distriksmunisipaliteit Fezile Dabi (Noord-Vrystaat), oral saam met Magashule beweeg.
Magashule het darem sy kruisies op die drie stembriewe in privaatheid getrek.
Voordat Magashule sy tweede stembrief in die briefhouer gegooi het, het hy eers vir Ramokhoase gewys wáár hy sy kruisie getrek het. Magashule het in ’n ligte luim met kommentaar voordat hy elke stembrief gepos het, dit duidelik gemaak vir watter party hy stem.
“Om te stem is baie belangrik,” het Magashule buite die saal gesê.
“Ek voel baie bly dat ek dié belangrike ding gedoen het. Om te kan stem was iets –’n reg – waarvoor ons baie lank geveg het.”
Magashule sou luidens die media-uitnodiging om 10:00 gestem het, maar het omstreeks 11:25 by die stembus opgedaag. Hy het egter dadelik weer vertrek omdat die SABC nog nie daar was nie.
Hy het ongeveer ’n halfuur later ná die SAUK se aankoms om 12:05 gestem.
- Volksblad