Maak seker stembrief het stempel

2011-05-17 07:22

Pieter Steyn

Bloemfontein - Stembriewe moet ’n stempel van die Onafhanklike Verkiesingskommissie (OVK) agterop hê. En dis kiesers wat moet toesien dat dit wel só is.

Dit het Maandag geblyk nadat ’n navraag aan die OVK gerig is oor die vermaning op Facebook en in ’n kettingboodskap per e-pos.

Die OVK ontken egter die bewering, luidens dié gerugte, dat die stempel agterop stembriewe ’n OVK-poging is om stemme vir opposisiepartye te beperk.

Volgens Mmabatho Mfete, Vrystaatse OVK-woordvoerder, moet stembriewe in die stemlokaal gestempel word wanneer ’n OVK-beampte dit aan ’n kieser uitreik.

“Kiesers moet seker maak dat die stembrief wel ’n stempel kry.”

Mfete sê die kieser moet daarna na die stemhokkie beweeg en sy of haar kruisie trek. “Dit is onwaar dat dit gedoen word om ’n party te bevoordeel. Alle stembriewe in alle streke moet die stempel kry.”

Luidens die e-pos wat die ronde doen, word die stempel agterop die stembrief gebruik sodat briewe wat nie langs die ANC ’n kruisie het nie, bedorwe verklaar word om die regerende party te bevoordeel.

“Die stembrief is inderdaad bedorwe as dit nié ’n stempel op het nie en die stem sal nie tel nie,” het Mfete gesê.

Sy sê die doel van die stempel is om verkiesingsbedrog te verhinder.

OVK-beamptes kan ook nie die stembriewe vooruit stempel nie. Dit moet gestempel word terwyl die kieser toekyk.

- Volksblad