Lae stempersentasie weens Tatane se dood
2011-05-19 07:14
Ficksburg - Toe die son Woensdagmiddag hier agter die Imperaniberg sak, het slegs sowat 30% van die dorp en Meqheleng se geregistreerde kiesers die moeite gedoen om te stem.
By die Meqheleng-laerskool naby die huis van Andries Tatane, wat op 13 April in ’n betoging teen swak dienslewering deur die polisie doodgeskiet is, het net 511 van die 2 914 (17%) van die geregistreerde kiesers teen 17:00 opgedaag.
Die senior beampte van die stempunt het die swak opkoms betreur.
“Dis jammer. Maar hierdie is Andries Tatane se wyk en die mense hier is nog kwaad.”
By Tatane se huis het sy vrou, Rose Makananelo Motlhaping, gesê sy het gaan stem.
“Dit het goed gevoel, want dis wat Andries die graagste sou wou doen vandag. Hy het so uitgesien na hierdie verkiesing. Ek weet min mense van Meqheleng het gaan stem vandag. Hulle is te kwaad. Maar dis jammer, want hoe anders gaan ons die mense wat nie in die munisipaliteit hoort nie, daar uit kry?”
Dit was nie net in Tatane se buurt waar die opkoms swak was nie.
By geeneen van die ander stempunte wat Volksblad aangedoen het, was die opkoms hoer as 35% nie.
Beamptes by die punte het almal gesê dit was baie rustig gedurende die dag en mense het drupsgewys ingekom en hul kruisies getrek.
Met die koelerige skemerluggie wat teen die einde van die dag deur die omgewing getrek het, het hulle dit betwyfel of daar veel meer mense in die laaste uur gaan opdaag om te stem.
Oral was inwoners dit eens dat die afgelope maand se betogings en die dood van Tatane Woensdag se verkiesing beïnvloed het.
In die Tuinbousaal op die dorp het ook net 43% van geregistreerde kiesers teen laatmiddag opgedaag.
George Pietersen, DA-wykskandidaat, meen sy party het goed gevaar. Hy het gekla oor vuilspel van die ANC.
“Hulle het steeds werwing gedoen vandag en het mense gedreig dat hul pensioene afgevat sal word indien hulle nie vir die ANC stem nie.”
Terwyl party inwoners van Meqheleng gaan stem het, het die meeste met kruiwaens en kanne gesukkel om water na hul huise aan te dra.
“Maak nie saak wie hierdie verkiesing wen nie, hierdie gemors (swak dienste) sal moet stop. Ons sal hulle dwing om dit te stop,” het een gesê.
- Volksblad