Helfte van stemme reeds gefinaliseer

2011-05-19 11:11

Pretoria – Meer as die helfte van die uitslae van die 2011 plaaslike regeringsverkiesing was teen vroeg Donderdagoggend gefinaliseer, het 'n beampte van die Onafhanklike Verkiesingskommissie (OVK) gesê.

"Ons is net verby die halfpadmerk," het Stuart Murphy, die OVK se hoof van verkiesingskwessies, voor 10:00 gesê.

Al die stemme is reeds getel en 54% is reeds nagegaan.

Beamptes het Woensdagaand nadat die stemlokale gesluit het, met die telproses begin.

Nadat dié proses afgehandel is, is strokies met die uitslae ingevul en na die OVK-kantore geneem.

Eksterne ouditeurs het die skandering van die strokies nagegaan en daarna het die uitslae begin deurkom.

Nasionale uitslae ná 10:00 toon dat die ANC 62,59% van die stemme, die DA 23,78% en Cope 2,8% van die stemme het.

Volg Nuus24 op Twitter

- SAPA