Fourways-stemlokaal 'n 'ramp'

2011-05-18 09:56

Fourways - Die stemlokaal by die Fourways High School in Johannesburg is "heeltemal ongeorganiseerd" en het Woensdag 30 minute laat geopen, het 'n kieser gesê.

"Daar was hoegenaamd geen beheer nie en dit het my meer as twee en 'n half uur geneem om my stem uit te bring," het Christine Jones gesê.

Die skoolhekke het om 07:00 geopen om mense in te laat, maar die deure van die stemlokaal self het eers om 7.30am geopen.

Sy sê daar was twee rye, een vir bejaarde, gestremde en swanger vroue, en die ander vir gewone burgers.

"Die kiesbeamptes het net aandag geskenk aan mense in die ry vir gestremdes en het heeltemal van ons vergeet," het Jones gesê.

Die probleem is vererger deur die feit dat die lokaal slegs een toestel gehad het wat plakkers uitdruk om op identiteitsdokumente te plaas ná 'n stem uitgebring is.

Ná 'n uur se stemmery was daar nie meer papier oor nie.

"Dit het regtig lank geneem om deur almal te gaan met net een toestel.

"Ongeveer 09:00 het hulle besluit om die streeksentrum te skakel om nog 'n toestel te kry."

"Dit was 'n nagmerrie. Ek is eers om 09:00 by die stemlokaal weg," het Jones gesê.

- Volg Nuus24 op Twitter.

- SAPA