Ek sal dit self doen, sê Mandela oor stemmery
2011-05-17 09:35
Johannesburg - “Ek is oukei. Ek sal dit self doen,” het oudpres. Nelson Mandela Maandagoggend gesê toe hy ’n spesiale stem in sy huis in Houghton uitgebring het.
Amptenare van die Onafhanklike Verkiesingskommissie (OVK) het hom daar besoek.
Dr. Brigalia Bam, voorsitter van die OVK, het ná die tyd vir joernaliste gesê Madiba lyk baie gesond en presies nog soos die staatsman wat almal ken.
“Madiba het formeel aansoek gedoen om te stem en hy het sy ID-dokument byderhand gehad. Daar was reeds ’n tafel reg vir ons. Almal het oormekaar geval om hom te help, maar hy het gesê: ‘Nee, nee, ek is oukei. Ek het nie hulp nodig nie. Ek sal dit self doen.’
“Hy het toe self die vorms ingevul. Ons was almal baie verbaas. Hy dra dan nie eens ’n bril nie,” het Bam gesê.
Volgens haar was sy vrou, Graça Machel, en ’n kleindogter teenwoordig, maar almal het na die sitkamer gegaan om vir Madiba ruimte te gee om te stem.
“Dit is ’n wonderlike dag en ek glo alle Suid-Afrikaners gaan geïnspireerd voel om te stem as hulle weet Madiba het dit reeds gedoen,” het Bam gesê.
Madiba se dokter was ook teenwoordig en volgens hom het die oudpresident gewig opgetel.
“18 Mei is D-dag vir ons. So ver gaan dit goed. Ek glo alles gaan goed verloop,” het Bam gesê.
Oudpres. Thabo Mbeki het ook Maandagoggend gestem. Hy was omstreeks 10:00 by die stempunt by die Holy Family College in Oxfordstraat omdat hy op pad is na die Soedan en nie môre sal kan stem nie.
- Volksblad