Dexter verdedig Cope-dokument

2011-05-26 16:35

Johannesburg - Die kommunikasiehoof van Cope, Phillip Dexter, het Donderdag sy besprekingsdokument, waarin hy glo gesê het dié party is dood, verdedig teen “sensasionalistiese” mediaberigte en gesê hy het nié die party “dood” genoem nie.

“Vandag het verskeie koerante berig oor ‘n besprekingsdokument wat ek ontwerp het, waarin ek my persoonlike beskouing van die stand van Cope gestel het... dit is jammer dat die reaksie was om die kwessies te sensasionaliseer, pleks daarvan om die kwessies wat ek opgehaal het, te bespreek,” het Dexter gesê.

“Enige berigte dat ek gesê het Cope is dood, is bloot vals... ek het baie duidelik die moontlikheid van hernuwing geartikuleer.

“In dieselfde asem – enige berigte dat ek die President van Cope blameer vir die stand van die party, is ook vals... ek het dit baie duidelik gestel dat die kollektiewe leierskap verantwoordelik is vir die stand van die party.”

Dexter beweer in sy dokument dat verkiesingslyste in die 2009- en 2011-verkiesings gemanipuleer is.

“Op die oomblik is daar burgemeesters- en raadslidkandidate wat nie net onvanpas is nie, maar geen lid van die party kan aan enigiemand verduidelik hoe en deur wie hulle verkies is nie. Dit is asof hulle uit die lug geval het.”

Hy beweer verder dat partyfondse wanbestuur en “gereeld misbruik” word.

‘n Berig in die Times het Donderdag ‘n bron in die party aangehaal wat glo gesê het Dexter se dokument is die “eerste skoot wat gevuur is in die leierskapstryd tussen Dexter en (Mosiuoa) Lekota”. Lekota het egter in ‘n onderhoud gesê hy het nie Dexter se dokument as ‘n aanduiding dat hy president van die party wil wees, gesien nie.

- Volg Nuus24 op Twitter

- SAPA