DA het 43 wyke van die ANC afgevat, spog Zille

2011-05-21 07:15

Politieke redaksie

Pretoria - Die DA het in die afgelope plaaslike verkiesing altesaam 43 wyke van die ANC weggevat, het Helen Zille, nasionale DA-leier Vrydag gesê.

Luidens ’n ontleding wat die DA van die 2011- plaaslike verkiesing gedoen het, is daar nege munisipaliteite in die Wes-Kaap waar die party in koalisie met kleiner opposisiepartye kan regeer om ANC-beheer oor dié munisipaliteite te verhoed.

“Die DA het sy steun in Kaapstad van 42% in 2006 tot 63% in 2011 vergroot,” het Zille gesê.

Sy was veral trots daarop dat Suid-Afrikaners van alle oorde byval gevind het by die DA se boodskap van versoening.

“Al was daar mense – selfs in ons eie party – wat gesê het ons sal ons tradisionele steunbasis verloor as ons uitreik na ’n ander groep,” het Zille gesê.

Sy het benadruk dat die DA bereid is om met politieke partye saam te werk wat sy beginsel van nie-rassigheid en diversiteit deel.

“Ons sal nié in koalisie met ander partye gaan bloot ter wille van mag nie.” Zille het samewerking met die ANC voorts uitgeskakel deur te sê die regerende party is ras-gedrewe en nasionalisties, terwyl die DA gelyke geleenthede vir almal voorstaan.

Dit is duidelik dat pres. Jacob Zuma die ANC gedurende die party se Siyangcoba-verkiesingsbyeenkoms in Johannesburg verlede week geposisioneer het as ’n beweging wat aan die verlede vasklou. “Asof enige politieke party ’n bepaalde rassegroep aanhang,” het sy bygevoeg.

In teenstelling met die hedendaagse ANC omarm die DA (oudpresident) Nelson Mandela se waardes van versoening en diversiteit, volgens Zille.

Volg Nuus24 op Twitter.

- Die Burger