Agt provinsies verloor geld vir infrastruktuur
2011-04-08 09:14
Kaapstad - Agt uit die nege provinsies se geld vir die skep van infrastruktuur is dié week summier teruggetrek omdat die geld nié in die vorige boekjaar bestee is nie.
Pravin Gordhan, minister van finansies, het Maandag in die Staatskoerant afgekondig dat R2,4 miljard van agt provinsies – die Wes-Kaap uitgesluit – weens onderbesteding weggeneem word.
Die Wes-Kaap is die enigste provinsie wat sy volle infrastruktuurtoewysing van R794,8 miljoen ontvang én bestee het.
Gordhan se woordvoerder, Lindani Mbunyuza, het Donderdag gesê die nasionale tesourie het die provinsies reeds in Januarie vanjaar gewaarsku om verbeterings aan te bring sodat hul infrastruktuurbegrotings na behore bestee kan word.
“Slegs die Wes-Kaap het die regte stappe gedoen sodat sy geld oorgeplaas kon word,” het Mbunyuza gesê.
Volgens hom sal die R2,4 miljard teruggehou word totdat projekte die oorbetaling na die provinsies regverdig.
Die grootste hindernisse wat tot die onderbesteding van infrastruktuurbegrotings lei, is ’n swak verkrygingsbeleid, kontrakbeheer en onvoldoende finansiële stelsels by provinsies, het Mbunyuza gesê.
Die staking van toewysings is veral rampspoedig vir arm provinsies, soos die Oos-Kaap, wat ’n groot behoefte aan infrastruktuurontwikkeling het, maar ’n halfmiljoen rand (25%) van sy toewysing kwyt is.
In die Vrystaat, Noord-Kaap en Mpumalanga het provinsiale regerings byna die helfte van hul toelae weens onderbesteding verloor.
Die nasionale tesourie mag ingevolge die Wet op die Verdeling van Inkomste die oordrag van geld aan ’n provinsie of munisipaliteit staak wanneer ’n begroting nie in ’n betrokke boekjaar bestee is nie.
Die infrastruktuurbegrotings wat van die agt provinsies weerhou word, beloop nagenoeg R2,5 miljard, terwyl die toewysing vir biblioteekdienste en die begroting vir hospitaalopknapping in sommige provinsies ook herroep is.
’n Bykomende R50,2 miljoen wat vir gemeenskapsbiblioteekdienste in die Oos-Kaap, KwaZulu-Natal, Limpopo, Noord-Kaap en Noordwes bedoel was, is ook teruggetrek.
Daarbenewens het die departement van gesondheid R452,6 miljoen aan ses provinsies (die Oos-Kaap, Vrystaat, Gauteng, KwaZulu-Natal, Limpopo en die Noord-Kaap) gestop. Dié geld was vir die opknapping van hospitale bestem.
James Selfe, DA-LP, het Donderdag op ’n nuuskonferensie dié toedrag van sake onthul.
“Dit is besonder betekenisvol dat die regering nié die terugtrekking van die begrotings wyd bekend gemaak het, behalwe in die Staatskoerant nie,” het hy opgemerk.
“Dis waarskynlik omdat dit so naby aan die plaaslike verkiesing is.”
- Volksblad