ANC stewig in saal in Vrystaat
2011-05-21 08:36
Bloemfontein - Met 79% van die Vrystaat se uitslae Vrydagaand teen 19:00 bekend, was die ANC beslis stewig in die saal.
Die bewindsparty kan dalk selfs by sy steun van 77,3% in 2006 draai.
In die provinsie het die ANC sover 18 uit die 20 munisipaliteite ingepalm en 71,6% van die steun gekry.
Die DA het gegroei en teen Vrydagaand het 20,1% Vrystaatse kiesers dié party gesteun teenoor 12,5% in 2006.
Soos deur kenners voorspel, het kleiner partye, soos die VF+, se steun gekrimp. Gisteraand het die party se Vrystaatse steun op 1,7% teenoor bykans 3% in 2006 gestaan.
Cope, wat die eerste keer aan ’n munisipale verkiesing deelgeneem het, se Vrystaatse steun het op 3,8% gestaan. In 2009 het 11,6% Vrystaatse kiesers vir dié party in die nasionale verkiesing gestem.
Die ACDP in die provinsie kon in Woensdag se verkiesing slegs 0,25% stemme trek teenoor 1,2% in 2006.
Volgens mnr. Chris Mepha, Vrystaatse OVK-hoof, is slegs twee Vrystaatse munisipaliteite se uitslae nog uitstaande – die Mangaung-metro en Maluti-a-Phofung.
Volgens Mepha het tegniese probleme, onder meer stukkende skandeerders, stelselprobleme en kragonderbrekenings, veroorsaak dat dié uitslae gister nog nie finaal afgehandel was nie.
Die ANC se steun het in die meerderheid van die munisipaliteite effens afgeneem. Dié party het byna 400 setels in die Vrystaat gekry en dié getal sal toeneem nadat die twee uitstaande munisipaliteite se uitslae bekend word.
Die DA het tot dusver byna 100 setels verower en Cope net meer as 20. Die VF+ het het agt Vrystaatse raadslede.
Intussen het die ANC op nasionale vlak sy verliese in vandeesweek se plaaslike verkiesing en die DA se vordering met minagting afgemaak.
Mnr. Gwede Mantashe, sekretaris-generaal, het by die nasionale uitslagsentrum in Pretoria gesê die DA yl as hy dink hy het ANC-steun weggeneem en verduidelik die ANC het weer eens ’n groot mandaat by kiesers ontvang.
Die jongste persentasies dui daarop dat me. Helen Zille en die DA hul aanspraak op ’n “triomfantlike uitslag” kan staaf.
DA-steun het in al die provinsies en metrorade toegeneem. Intussen het die ANC s’n oral afgeneem, behalwe in KwaZulu-Natal, waaronder die Ethekwini-metroraad (Durban), waar dit toegeneem het.
Stemme vir die DA het sedert die vorige plaaslike verkiesing in 2006 met 89% gestyg – nagenoeg 1,4miljoen meer. Hy het boonop 133 wyke landwyd by die ANC afgeneem en net vyf aan die party afgestaan.
Zille het die toename in swart steun vanaf rofweg 1% in 2009 tot die huidige 5% as ’n waterskeiding vir haar party beskryf. Swart kiesers verteenwoordig nou 20% van algehele DA-steun.
Alles was egter nie maanskyn en rosegeur nie. Die DA kon nie daarin slaag om ’n enkele nuwe raad buite die Wes-Kaap te wen nie en sy steun in landelike provinsies soos Limpopo bly baie laag.
Zille se grootste teleurstelling is dat die Nelson Mandelabaai-metroraad (Port Elizabeth) onder ANC-beheer bly, grootliks omdat Cope nie genoegsame steun gekry het om ’n koalisieregering saam met die DA te vorm nie.
- SAPA