ANC looi sakesektor, boere omdat ‘mense nie kon stem’

2011-05-20 08:42

Alicestine October

Kaapstad - Onpatrioties en onsimpatiek!

Dít is hoe die ANC die Wes-Kaapse sakesektor Donderdag veroordeel het omdat dié sektor glo “nie reëlings getref het vir werkers om te gaan stem nie”.

Michael Bagraim, woordvoerder van die Kaapse Sakekamer, het die beskuldigings en bewerings verwerp.

Maar volgens Songezo Mjongile, provinsiale sekretaris van die ANC, het die party klagtes ontvang oor supermarkte, afdelingswinkels en sommige sekerheidsdienste wat hul werknemers na bewering lang ure laat werk het sonder om te reël dat hulle kon gaan stem.

“Dit is onpatrioties en onsimpatiek teenoor die behoeftes en regte van mense wat die wiele in dié sektor aan die rol hou.”

Bagraim het die klagtes as onregverdig en opportunisties bestempel.

“Ons het in die media en oor nasionale en gemeenskapsradiostasies gevra dat werknemers toegelaat moet word om te gaan stem.

“Dit is ’n skoot in die donker om so op onbevestigde stories te steun.

“Daar is niks by ons aangemeld nie.”

Die boeregemeenskap in sekere dorpe in die Overberg is ook gekap.

Die DA en die ANC het hul teleurstelling uitgespreek oor die situasie in Swellendam, waar plaaswerkers glo eers ná 19:00 met vragmotors na die stembus aangery en toe weggewys is.

Carl Opperman, woordvoerder van Agri Wes-Kaap, het gesê daar was ’n ooreenkoms tussen die boere in die provinsie en die Onafhanklike Verkiesingskommissie (OVK).

“Daar is niks by ons aangemeld nie.”

Trevor Daniels van die OVK het Donderdagaand bevestig geen amptelike klagtes is by die kommissie aangemeld nie.

“Mense het tot twee dae ná die verkiesing kans om te kla en die klagtes word by die nasionale kantore aangemeld.”

Volg Nuus24 op Twitter

- Die Burger