ANC in Gauteng 'teleurgesteld'
2011-05-24 17:57
Johannesburg - Die ANC in Gauteng is “teleurgesteld” met hul uitslae in Indiese en bruin woongebiede rondom Johannesburg, het David Makhura, provinsiale sekretaris, Dinsdag gesê.
“Ons sal na die tekenbord terugkeer, wat ons werk in dié gemeenskappe betref,” het hy gesê by die aankondiging van die burgemeesters in die provinsie.
“Wat is die kwessies by die hart van hierdie gemeenskappe, wat die ANC gemis het?”
Makhura het gesê die ANC neem sy swak uitslae in dié gebiede “baie ernstig” op. Die party het areas soos Eldorado Park en Lenasia, wat vroeër onder sy beheer was, in die pas afgelope plaaslike verkiesings verloor.
Beide die Indiese en bruin gemeenskappe is “historiese kieserskorpse van die ANC,” het hy gesê.
Die party sal intense kiesersanalise van stapel stuur om te bepaal wat hierdie groepe laat besluit het om óf van die stempunte weg te bly, óf om vir ‘n ander party te stem.
Gwede Mantashe, sekretaris-generaal, het kort ná die mediakonferensie by die party se hoofkwartiere ook kommer uitgespreek oor die afname in ondersteuning onder minderheidsgroepe.
“Ou aktiviste bly lojaal aan die ANC, maar daardie sirkel word kleiner en kleiner,” het hy gesê.
Hy het toegegee dat gemeenskappe moontlik “afgesit” kan wees deur kommentaar wat “rassisties voorkom” deur ANC-leiers, maar het bygevoeg dat Suid-Afrikaners “steeds te oorsensitief teenoor mekaar is”.
Hy is gevra oor kommentaar wat byvoorbeeld deur die ANC-Jeugligaleier, Julius Malema, gelewer is. Opmerkings dat wit mense misdadigers is, is nie ANC-beleid nie, het Mantashe gesê.
“Opmerkings wat wegbeweeg van ANC-beleid doen niks goeds vir die ANC nie.”
Makhura het gesê die ANC sal oor die volgende vyf jaar poog om ‘n teenwoordigheid te kweek in die noordelike voorstede van Johannesburg en die oostelike voorstede van Tshwane, waar die party geen wyke kon wen nie.
Die ANC in Gauteng het sy burgemeesters vir die 11 munisipaliteite wat hy in die provinsie gewen het, bekend gestel.
Die voormalige finansiële baas van Johannesburg, Parks Tau, is die stad se nuwe burgemeester. Hy vervang Amos Masondo ná Masondo se twee termyne.
Mondli Gungubele word die burgemeester van Ekurhuleni; Kgosientsho Ramokgopa van Tshwane; Mpho Nawa van Wesrand; Simon Mofokeng van Sedibeng; Greta Hlongwane van Emfuleni; Calvin Seerane van Mogale City; Maphefo Letsie van Merafong; Sylivia Thebenare van Randfontein; Lerato Maloka van Lesedi en Nonkoliso Tundzi van Westonaria.
Priseka Ramashu sal die opposisie in Midvaal lei.
- Volg Nuus24 op Twitter
- SAPA