eNaTIS-kontrak gekap
2010-09-30 07:01
Kaapstad. – Die kontrak van Tasima, die maatskappy wat die nasionale verkeersinligtingstelsel eNaTIS bedryf, is met nóg vyf jaar verleng sonder dat die departement van vervoer vir tenders geadverteer het.
Stuart Farrow, DA-LP en woordvoerder oor vervoer, het gister gesê die kontrak beloop ’n paar honderd miljoen rand.
Farrow is in besit van korrespondensie waarin Collins Letsoalo, waarnemende uitvoerende hoof van die Padverkeersbestuurskorporasie (RTMC), Tasima en die departement van vervoer waarsku dat die eensydige verlenging van die kontrak neerkom op minagting van die Wet op die Bevordering van Administratiewe Geregtigheid (Paja).
“Die kontrak moes lankal geadverteer gewees het. Tasima se tariewe is baie hoog vir ’n instandhoudingskontrak. Die departement kan dit gewoon nie bekostig nie.
“Ook die (parlement se) staande komitee oor openbare rekeninge (Skoor) dring daarop aan dat die kontrak vir tenders geadverteer word. Ons kan dit nie anders benader nie ... ek kan dit (die verlenging) nie ondersteun nie,” lui Letsoalo se brief van 28 April aan Zakhele Thwala, waarnemende direkteur-generaal van vervoerregulasies.
Letsoalo het ’n week later in ’n tweede brief gesê die nuwe Tasima-span wat eNaTIS in stand moet hou, is “minder ervare” as die aanvanklike span en dat dié kontrak deur ’n “regverdige, deursigtige en kostedoeltreffende tenderproses soos vereis deur die Grondwet” toegeken moet word.
George Mahlalela, direkteur-generaal (DG) van vervoer, het Tasima se kontrak nogtans op 12 Mei op Thwala se versoek met nog vyf jaar verleng.
Dít het Letsoalo genoop om ’n brief aan Tasima te skryf waarin hy waarsku die verlenging van die kontrak is “onreëlmatig en onwettig” en dat hulle dit moet “ignoreer”.
Mnr. Philip van der Merwe, woordvoerder van Tasima, het gister gesê wat húlle betref, is die kontrak geldig. “Die DG het in ’n brief bevestig die kontrak ís geldig en wettig. Hy het gesê dis nie deel van die RTMC (waaraan eNaTIS eindelik oorgedra gaan word) se mandaat om teen die kontrak beswaar aan te teken nie.”
Die eNaTIS-kontrak is vir die eerste keer in Desember 2001 aan Tasima toegeken en het in Mei 2008 verstryk. Tasima het eNaTIS daarna op ’n maandelikse grondslag in stand gehou.
Farrow gaan versoek dat die DG voor Skoor verskyn en ook vra dat ondersoek ingestel word na die moontlikheid dat die Wet op Open-bare Finansiële Bestuur oortree is.
Belastingbetalers het teen Junie 2007 reeds R408 miljoen vir eNaTIS opgedok. Duisende mense het in dié jaar dae aanhoudend buite lisensiekantore gestrand gestaan toe die stelsel ineengestort het.
Beeld het destyds berig die ouditeur-generaal het erge veiligheids-gebreke uitgewys en die departement vooraf gewaarsku dat eNaTIS sou misluk.
Sam Monareng, woordvoerder van die departement van vervoer, kon teen druktyd nie op vrae reageer nie omdat die DG uitstedig was.