Premier: 'Te min wittes vier Versoeningsdag'
2010-12-16 22:37
Die premier van die Noordwes provinsie, Thandi Modise,het gesê die regering moet ondersoek instel na die oorsake waarom so min van die land se wittes nie aan Versoeningsdag-vierings deelneem nie.
Sy het Donderdag tydens 'n herdenkingsgeleentheid op Vryburg ook gesê daar moet ingegryp word in gebiede van konflik tussen plaaswerkers, plaasbewoners en werkgewers.
By Thaba Tshwane in Pretoria het militêre veterane die regering bedank omdat hy erkenning aan hulle gegee het vir hulle bydrae tot die vryheidstryd in die land.
Dit was vandag die eerste keer sedert 1994 wat die voormalige Suid-Afrikaanse Weermag en militêre veterane van MK, Apla en Azapo saam Versoeningsdag gevier het.
In Kaapstad het die rektor van die Universiteit van die Vrystaat, Professor Jonathan Jansen gesê hoewel baie reeds gedoen is om hindernisse te verwyder, is daar steeds verdeeldheid tussen mense in die land.
- RSG