Zuma wil nie sê oor wapens
2012-03-16 08:45
Kaapstad – Pres. Jacob Zuma het gesê hy kan nie voorspel wat die uitslag van ’n regterlike kommissie se ondersoek na die wapen-skandaal gaan wees nie.
Dit is ’n debat vir ’n sango-ma, het hy geskerts.
Hy het in vraetyd in die Nasionale Vergadering gereageer op ’n vraag van Lindiwe Mazibuko, DA-leier in die parlement. Sy wou weet of Zuma die verslag na afloop van die ondersoek bekend sal maak.
Zuma het gesê hy sal deur die uitslag van die finale verslag gelei word. Hy het daarop gewys dat die ondersoek belangrik en sonder twyfel in die openbare belang is.
“Ek sal, wanneer ek die finale verslag van die kommissie ontvang, dit só hanteer dat dit in die openbare belang sal wees én sal voldoen aan die grondwetlike beginsels waartoe ek verbind is.”
Hy wil uit eerbied vir die kommissie nie die toekoms voorspel of die werk vooruitloop nie.
“Ek sal gelei word deur die aanbevelings van die verslag, ook of dit openbaar gemaak moet word of nie. Om dit anders te hanteer sal onregverdig aan die kommissie voorskryf hoe hy sy aanbevelings moet saamstel.”
Mazibuko het gesê onsekerheid oor of die verslag bekend gemaak sal word, wek twyfel oor of die regering werklik daartoe verbind is om korrupsie vas te vat.
Zuma het in reaksie gesê die ondersoek is op die punt om te begin en daar is reeds ’n debat oor wat met die finale verslag moet gebeur. “Dit is ’n debat vir ’n sangoma. Ons moet nou voorspel hoe dit gaan lyk ...,” het hy onder luide gelag gesê.
Hy het voorts gesê: “As jy dokter toe gaan, weet jy nie wat die diagnose sal wees nie, maar nou moet jy dit nou al bespreek. Ek dink nie dit is regverdig nie.”
Papi Kganare, Cope-LP, wou weet of Zuma hom vir ’n openbare ondersoek beskikbaar sal stel, soos wat die Cope-leier, mnr. Mosiuoa Lekota, destyds as minister van verdediging gedoen het.
Zuma het gesê die kommissie sal uit die aard van die saak vrae aan mense wil stel. “Dit kan Mosiuoa Leko-ta wees wat tóé die minister van verdediging was, of dit kan Jacob Zuma wees wat destyds die adjunkpresident was. Dit is ’n kommissie wat die waarheid sal moet vasstel. Wie ook al geroep word om te gaan, sal gaan. Ek dink nie daar sal enige probleem daarmee wees nie.”
– Volg Nuus24 op Twitter
- Die Burger
