Zuma wens Obama geluk

2012-11-07 10:23

Pres. Barack Obama. (J Scott Applewhite, AP)

Pretoria – Suid-Afrika se pres. Jacob Zuma het pres. Barack Obama Woensdag met sy herverkiesing geluk gewens, en die VSA gevra om voort te gaan om 'n positiewe rol in Afrika te speel.

"Ons heg baie waarde aan ons verhouding met die VSA en sien daarna uit om bilaterale samewerking in die jare wat kom, te versterk," het Zuma in 'n verklaring gesê.

"Suid-Afrika is vol vertroue dat die VSA sal voortgaan om 'n positiewe rol in hierdie verband te speel".

Die VSA is Suid-Afrika se derde grootste handelsvennoot, ná China en Duitsland.

Obama se oorwinning in die sleutelstaat Ohio het hom gehelp om die nodige stemme in die Amerikaanse kieskollege in te palm. Hy het ook oorwinnings behaal in Wisconsin, Iowa, Pennsilvanië en New Hampshire – almal state waarop Romney gefokus het – terwyl die Republikein net een belangrike slagveldstaat, Noord-Carolina, in sy guns kon swaai.

– Volg Nuus24 op Twitter.

- AFP