Zuma 'weet nie' van Dalai Lama-visum
2011-10-03 13:00
Johannesburg – Pres. Jacob Zuma het Maandag gesê hy weet nie of die Dalai Lama se Suid-Afrikaanse visum goedgekeur gaan word nie.
"Die departement van internasionale betrekkinge en samewerking hanteer die saak. Ek weet nie wat die finale uitslag gaan wees nie. Ek dink nie jy kan 'n definitiewe antwoord van my kry nie."
Zuma het Maandagoggend op 'n sake-ontbyt in Sandton gepraat.
Dié ontbyt is deur The New Age en die SABC gereël om die president die geleentheid te gee om die land in kennis te stel oor die vordering wat Zuma se administrasie sedert die begin van die jaar gemaak het.
City Press het berig die Dalai Lama, geestelike leier van Tibet, sal Maandag van die departement se besluit in kennis gestel word. Volgens 'n anonieme bron in die departement sal dié visumaansoek afgekeur word om te verhoed dat Suid-Afrika se bande met China geskaad word.
Die Dalai Lama is na dr. Desmond Tutu se 80ste verjaardag, wat eerskomende naweek gehou word, genooi.
Hy het twee jaar gelede om 'n visum aansoek gedoen, maar dié aansoek was onsuksesvol.
Zuma het gesê dit is onregverdig van mense om hom te vra of die Dalai Lama se visum toegestaan gaan word of nie.
"Ek weet nie of ek die vraag moet beantwoord nie, om daar departemente is wat die kwessie hanteer. Hoe moet ek weet?"
– Volg Nuus24 op Twitter
- SAPA