Zuma wag op finale Limpopo-handboekverslag

2012-07-31 16:35

Johannesburg – Pres. Jacob Zuma wag vir die finale verslag wat handel oor die vertragings in die Limpopo-handboeksage, het die presidensie Dinsdag in 'n verklaring gesê.

“’n Voorlopige verslag is reeds deur die president ontvang, maar nou word daar gewag op die finale verslag wat deur die presidensiële taakspan saamgestel is onder leiding van die adjunk-minister van finansies, Nhlanhla Nene.”

Volgens die verklaring beskou pres. Zuma die handboek-sage in ’n ernstige lig en die saak toon dat onderwys 'n prioriteit is. Die presidensie sê Zuma het bygevoeg daar sal gevolge wees vir diegene wat verantwoordelik is vir die laat aflewering van handboeke.

Zuma het die ministerie van onderwys gevra om saam met die nasionale tesourie en Limpopo se provinsiale regering te werk om te verseker dat voldoende hulpbronne beskikbaar is en dat handboeke volgende jaar betyds afgelewer word.

Limpopo se onderwysdepartement is verlede jaar onder administrasie geplaas weens swak bestuur en finansiële onreëlmatighede.

– Volg Nuus24 op Twitter.

- SAPA