Zuma-vriend wil dagvaar ná arres
2010-09-28 06:57
Johannesburg - Atul Gupta, miljardêr-vriend van pres. Jacob Zuma en eienaar van die nuwe koerant met ANC-bande, oorweeg regstappe teen die polisie weens wat hy “onregmatige arrestasie en xenofobie” noem.
Die staat het gister besluit om Gupta, eienaar van The New Age (TNA), nie op aanklag van regsverydeling te vervolg nie.
Hy is Saterdagaand in hegtenis geneem nadat hy hom glo teen die polisie verset het toe hulle sy BMW X5 wou deursoek. Hy was op pad na sy huis in Saxonwold, Johannesburg, toe die polisie hom op die R55 laat stilhou het. Sy lyfwag en bestuurder is glo deurgesoek, maar Gupta het glo geweier dat hy of sy motor deurgesoek word.
Luidens ’n berig in Sowetan het Gupta die twee polisiebeamptes daarmee gedreig dat hy “noue bande met top-polisiebeamptes het” en dat hy genl. Bheki Cele, nasionale polisiehoof, sou bel.
Gupta is na die Sandton-polisiekantoor geneem en kort ná middernag op waarskuwing vrygelaat.
Die Randburgse landdroshof het die saak nie gister op die rol geplaas nie. Die senior staatsaanklaer meen daar is geen saak teen Gupta nie.
Gupta en sy gevolg van regslui en lyfwagte het in twee luukse BMW’s by die hof opgedaag.
Cliff Alexander, Gupta se regsverteenwoordiger, het buite die hof gesê hulle oorweeg regstappe teen die twee polisiebeamptes, asook Sowetan.
“Mnr. Gupta is onregmatig gearresteer en aangehou en met xenofobie gedreig. Die polisiebeamptes het hom ’n Indiër genoem en selfs gesê hy moet teruggaan Indië toe.”
Hy het die bewerings oor Cele ontken.
“Mnr. Gupta het sy mag glad nie misbruik nie. Sy selfooninligting toon geen oproepe na Cele nie. Hy het slegs 10111 geskakel om vas te stel of die beamptes wel polisiebeamptes was, want hulle het nie so opgetree nie. Mnr. Gupta is uit sy motor gepluk. Die beamptes het ook nie ’n lasbrief gehad nie.”
Gupta self wou nie oor die voorval uitwei nie. Hy het die joernalis van TNA versoek om nie ’n storie daaroor te publiseer nie.
Voor dié versoek het Gary Naidoo, besturende redakteur van TNA en die Gupta-gesin se woordvoerder, gesê hy sal wel ’n “gebalanseerde berig” publiseer. Daarna het hy egter gesê Gupta se versoek is aan die redakteur deurgegee.
Die Gupta-gesin, wat ook die politieke joernaal The Thinker finansier, besit aandele in verskeie mynmaatskappye. Gupta se broer Rajesh en Zuma se seun Duduzane is sakevennote met aandele in die staalmaatskappy ArcelorMittal.
Gupta en sy gevolg van regsverteenwoordigers en lyfwagte daag gister by die hof op.
Gary Naidoo, besturende redakteur van The New Age en woordvoerder van die Gupta-gesin, gister buite die Randburg-landdroshof.
Foto: Felix Dlangamandla