Zuma vra Buthelezi om terug te kom na ANC
2010-08-29 07:23
Kaapstad - Pres. Jacob Zuma het gister vir dr. Mangosuthu Buthelezi, IVP-leier, gesê dit is tyd vir hom om terug te keer na die ANC.
“Die ANC wag vir jou,” het Zuma gesê.
Zuma en Buthelezi was gister huldeblyksprekers by die roudiens wat
in Kaapstad in die St. George-katedraal gehou is vir Joe Matthews,
gewese adjunkminister van veiligheid en sekuriteit.
’n Baie aangedane Zuma het in ’n ligter oomblik vir Buthelezi gesê
die land het nou nie meer ekonomiese sanksies nie en daarom het hy ook
nie meer ’n rede om by die IVP te bly nie.
Buthelezi het vroeër gesê hy is destyds uit die ANC-strukture omdat
hy nie met hulle saamgestem het oor die oproep om internasionale
sanksies teen Suid-Afrika nie.
“Sy (Buthelezi se) politieke benadering kom tog van die ANC af,” het Zuma gesê.
Zuma het begin vertel hoe geledere in ’n organisasie by die tou
moet inval, veral wanneer dit kom by die besluite van ’n nasionale
konferensie. Hierop het Buthelezi vanuit sy kerkbank met ’n geluid
gereageer wat wys hy stem nie saam nie.
Matthews se dood het daartoe gelei dat die ANC-adelstand en IVP-strydrosse gister saam in die kerkbanke gesit het.
Zuma het na Matthews se oorbeweeg van die ANC na die IVP verwys en
gesê die ANC het begrip gehad vir Matthews se nuwe “politieke tuiste” en
dat hy “vriendskaplike verhoudings tussen die IVP en die ANC” gesmee
het terwyl die bloedige konflik tussen die twee partye in KwaZulu-Natal
gewoed het.
Buthelezi het Matthews in die regering van nasionale eenheid onder
oudpres. Nelson Mandela gekies om saam met hom as IVP-lid in die kabinet
te dien.
Ná die gedenkdiens het Lindiwe Sisulu, minister van verdediging
en eredogter van Buthelezi, hom aan die hand na sy motor toe geneem.
- Rapport