Zuma verwelkom briewe oor inligtingswet
2010-09-11 08:00
Kaapstad – Die briewe van plaaslike en internasionale media en ander organisasies oor die Wetsontwerp op die Beskerming van Inligting en die voorgestelde mediatribunaal is deur pres. Jacob Zuma verwelkom.
Talle organisasies, waaronder Skrywers teen die Wetsontwerp op die Beskerming van Inligting, die Right2Know Campaign, South African Journalism Schools, World Association of Newspapers and News Publishers, Agence France Presse, Bloomberg, Associated Press en Reuters, het onder meer aan Zuma geskryf.
Lewendige debatvoering is ontketen sedert die wetsontwerp in die parlement ter tafel gelê is en sedert die ANC aangedui het dat die mediatribunaal later vandeesmaand by sy hoofraadsvergadering in Durban bespreek gaan word.
Die president het die bydraes tot die debat gister verwelkom. “Dit dui op die lewendigheid van die Suid-Afrikaanse samelewing,” lui die verklaring.
Dr. Siyabonga Cwele, minister van staatsveiligheid, sal aanstaande week ’n omvattende verslag oor die wetsontwerp aan die parlement lewer. Die minister het “geldige en bruikbare voorleggings” oorweeg wat tydens die openbare sittings gemaak is.
Intussen het die Suid-Afrikaanse Nasionale Redakteursforum (Sanef) sy vergadering Donderdag met die ANC as robuust en nuttig beskryf. Sanef het kommer uitgespreek dat die verhouding tussen die ANC en die media agteruitgegaan het na afloop van die Wêreldbeker-sokkertoernooi.
Die redakteursliggaam het sy verbintenis tot die selfregulering van die media en sterk teenkanting teen die tribunaal herhaal, wat hy glo ’n “ongeregverdigde, eksterne beheer van die onafhanklike media” verteenwoordig.
Die ANC het op sy beurt sy siening benadruk dat die stelsel van selfregulering onvoldoende is. Hy bly verbind daartoe dat die wenslikheid van ’n mediatribunaal ondersoek moet word.
- Die Burger