Zuma vervang korrupsiebestryder Willie Hofmeyr
2011-11-30 07:07
Kaapstad – Pres. Jacob Zuma het ’n vertroueling en eertydse raadgewer in sy vroeëre regstryd teen korrupsieklagte gister aangestel om die land se suksesvolste korrupsiebestryder, Willie Hofmeyr, te vervang.
Dié aanstelling van oudregter Willem Heath as hoof van die presidensie se spesiale ondersoekeenheid (SOE), is uit verskeie oorde veroordeel en selfs bestempel as “die Zumafikasie van onafhanklike instellings”.
Mac Maharaj, Zuma se woordvoerder, het die kritiek egter as “onregverdig” bestempel en gemaan dié “strategiese herstrukturering” moenie “verpolitiseer” word nie.
Hoewel Hofmeyr reeds die afgelope twee jaar onder kwaai druk was om te kies tussen die Nasionale Vervolgingsgesag (NVG) se batebeslagleggingseenheid en die SOE, het dié skuif nogtans as ’n groot skok gekom. Daar is betroubaar verneem die mense wat onder hom gewerk het, is platgeslaan.
“Ons is glad nie tevrede nie. Dit was totaal onverwags. Dis blêddie sleg,” is aan Volksblad gesê.
Jeff Radebe, minister van justisie en grondwetlike ontwikkeling, het Hofmeyr Dinsdagoggend uit die bloute na sy kantoor in Pretoria ontbied en hom ingelig Heath sal hom as hoof van die SOE vervang. Hofmeyr bly wel aan die stuur van die batebeslagleggingseenheid.
Heath, wat die SOE ook in die laat negentigs gelei het, het gisteraand aan Volksblad gesê hy het die pos aanvaar “omdat dit ’n direkte versoek van die president was”. Radebe het hom “’n ruk gelede” reeds genader oor die moontlikheid om by Hofmeyr oor te neem. “Maar dit het steeds vanoggend (Dinsdagoggend) as ’n verrassing gekom,” het Heath, tot Dinsdag nog een van Radebe se raadgewers, gesê.
Hy sal in Kaapstad gesetel wees en aan Zuma rapporteer.
Heath was voorheen ’n lid van Zuma se brein-trust wat hom geadviseer het gedurende sy regstryd met die NVG op aanklagte van korrupsie.
Die raad vir die bevordering van die Suid-Afrikaanse Grondwet (Casac) meen juis dit is dié “noue verhouding” met Zuma wat Heath se onafhanklike oordeel onder verdenking plaas.
“Dié besluit kan die staat se stryd teen korrupsie net verswak,” lui ’n sterk bewoorde verklaring wat Dinsdagaand uitgereik is.
Maharaj het die aantyging egter verwerp en gesê dit is onregverdig om Heath te etiketteer weens ’n diens wat hy destyds in ’n professionele hoedanigheid aan Zuma – toe nog net ANC-president – gelewer het.
Nog ’n ingeligte het op voorwaarde van anonimiteit gesê die ware rede vir die skuiwe is duister.
“Willie het albei poste sonder enige probleme hanteer. Hy het fantasties gevaar en dis nie asof een pos (ten koste van ’n ander) afgeskeep is nie. Mens moet dus vra wat Zuma aangespoor het om dít te doen.”
Maar volgens Maharaj moet die SOE sy eie hoof kry omdat die werklading aansienlik toegeneem het en Heath het jare se ervaring.
Debbie Schafer, DA-LP en woordvoerder oor justisie, het volgehou daar is “geen regverdiging” om summier van Hofmeyr ontslae te raak nie en het dit gebeur omdat hy waarskynlik “te onafhanklik” na Zuma se sin is.
“Heath is ’n Zuma-vertroueling. Dié (aanstelling) is net nog ’n stap in die Zumafikasie van onafhanklike instellings.”
Volg Nuus24 op Twitter
- Volksblad