Zuma verras gemeenskap op Sokker-Vrydag
2010-03-12 12:06
Johannesburg – President Jacob Zuma het Vrydag in ‘n sokkerhemp ‘n verrassingsbesoek aan die gemeenskap van Marabastad in Pretoria gemaak, het ANC-woordvoerder Zizi Kodwa gesê.
“Aangesien Vrydae sokker-Vrydae is, het hy hierdie dag gebruik om die Wêreldbeker-sokkertoernooi te bemark en om die geleentheid tussen ons mense te gebruik om ‘n jolige bui te skep in die lig van die toernooi.”
Kodwa het bygevoeg dat die vroegoggend besoek ook ‘n geleentheid vir Zuma was om met mense te gesels en na hul klagtes oor dienslewering te luister.
“Hy het na die mense en die smouse geluister,” het Kodwa gesê.
Die gemeenskap is rondom ‘n treinstasie gebou en dus is daar geen beskerming op warm of reënerige dae nie.
“Die smouse kan op sommige dae nie werk nie, want daar is nie afdakke nie.”
Die inwoners het die president ook gevra om met die munisipaliteit te praat sodat hulle die situasie kan verbeter.
Zuma het glo gesê dat hy met die burgemeester en die departement van vervoer sal gesels om veral die klein besighede te help.
“Dit was wonderlik. Daar was ‘n opgewekte gemoed en ons moes ‘n stormloop voorkom.”
Die president het glo beplan om twee ure met die gemeenskap deur te bring, maar hy moes ná ‘n uur gaan, het Kodwa gesê.
“Ons kon net nie bly nie as gevolg van die gemoed en ons het besluit om te gaan oor al die opwinding van die massas,” het Kodwa gesê.
- Sapa