Zuma veroordeel aanvalle
2011-03-22 07:04
Kaapstad - Pres. Jacob Zuma het die koalisiemagte se militêre ingryping in Libië Maandag veroordeel en aangevoer dit is ’n poging om kol. Muammar Gaddafi se bewind tot ’n val te bring.
Zuma het op die Menseregtedag-viering in Athlone buite Kaapstad gesê die militêre optrede strek wyer as die resolusie om ’n vliegspergebied oor Libië af te dwing wat vroeër deur die Verenigde Nasies (VN) se Veiligheidsraad aanvaar is.
Die president se skerp kritiek kom enkele dae nadat Suid-Afrika ten gunste van dié resolusie gestem het.
Vladimir Putin, Russiese premier, S.M. Krishna, Indië se minister van buitelandse sake, en Boiko Borisof, Bulgaarse premier, het onder andere ook die koalisiemagte se ingryping veroordeel.
Zuma het gesê: “Suid-Afrika sê nee vir die doodmaak van burgerlikes, nee vir die doktrine om ’n regime-verandering teweeg te bring en nee vir die buitelandse besetting van Libië of enige ander soewereine staat.”
Hy het ’n beroep op die koalisiemagte onder aanvoering van Amerika (VSA), Brittanje, Frankryk en Arabiese lande gedoen om militêre ingryping te beperk tot presies dít wat die resolusie bepaal.
Zuma het in die Athlone-stadion gesê Suid-Afrika skaar hom by die Afrika-Unie (AU), wat enige vorm van internasionale militêre inmenging in Libië verwerp het.
Net ’n vreedsame en politieke oplossing “gegrond op die wil van die mense van Libië” sal op lang termyn stabiliteit verseker, het Zuma volgehou.
Hy het ’n onmiddellike skietstilstand gevra.
Die koalisiemagte se aanvalle op militêre teikens in Libië het Maandag voortgeduur.
Die koalisie ontken Gaddafi is die teiken. Die VSA-regering het gesê Libië sal beter af wees sonder Gaddafi, maar die mense van Libië moet self besluit.
David Cameron, Britse premier, het volgens SkyNews in die parlement gesê die Libiese weermag se lugverdediging is grootliks deur die aanvalle geneutraliseer. Ontploffings is Maandagaand in Tripoli gehoor.
Die Libiese weermag het sowat 100 km uit die stad Benghazi – wat deur die rebelle beheer word – teruggetrek, maar rebelle in die stad Misrata, oos van Tripoli, het beweer 40 mense is dood ?toe soldate van die Libiese weermag op hulle geskiet het, het Sapa-AFP berig.
In Jemen het voorste generaals, ambassadeurs en enkele stamme hul steun gegee aan die betogers teen die regering van pres. Ali Abdullah Saleh, berig Sapa-AFP-Reuters.
- Volksblad