Zuma vaar uit teen leierskap van alliansie
2011-06-27 15:50
Midrand – Die beweging wat Suid-Afrika lei beleef 'n krisis, het pres. Jacob Zuma Maandag gesê, en uitgevaar teen swak dissipline, die voortydige oppering van belangrike debatte en die gebruik van fondse vir eie gewin.
"Lede van magtige organisasies dink hulle kan sake hanteer soos hulle wil en nie op die manier wat deur die situasie vereis word nie," het hy aan afgevaardigdes by 'n byeenkoms van Cosatu se sentrale komitee by Gallagher Estate in Midrand gesê.
"So kan ons byvoorbeeld besluit om te sê wat ons wil en nie omgee vir die beeld van die organisasie nie want ons glo al verloor ons stemme, is dit nie 'n groot verlies nie want ons is klaar so groot!" het hy gesê.
Volgens Zuma is die krisis waardeur die organisasie in die gesig gestaar word nie uniek aan die ANC nie, en was dit volgens hom ook al by ander bevrydingsbewegings 'n probleem.
"Ons sterk punt kan ons swak punt word as ons nie versigtig is nie," het hy gewaarsku.
Nog 'n probleem wat deur Zuma beklemtoon is, is die "verdwyning van respek en dissipline" in die ANC.
"... [Ons] het begin met 'n nuwe kultuur van die uitruil van opinies en die hantering van ander se sienings in die openbaar, voor ons dié sienings in ons eie organisasies bespreek met die mense wat daardie sienings het.
"Dit het 'n neiging begin waar ons voor almal op beleid besluit sonder om eers deur die behoorlike proses te gaan wat ons normaalweg sal help om die waardigheid van die organisasie te beskerm," het hy gesê, sonder om spesifiek na die ANC-jeugligaleier Julius Malema se uitsprake oor nasionalisering en grondhervorming te verwys.
Zuma het voorts gesê die "geld-probleem" het 'n "groot siekte" in die organisasie geword, en het gesê dat geld gebruik word om lede se eie belange te bevorder.
"Ons moet van hierdie siekte ontslae raak sodat ons organisasies, wat die revolusie wil beskerm, instrumente van die revolusie kan word, eerder as die instrumente van sekere klasse mense."
– Volg Nuus24 op Twitter.
- SAPA