Zuma swyg lank oor weermag-ontplooiing
2011-09-10 07:34
Kaapstad - Eers nege maande nadat pres. Jacob Zuma die weermag na die Golf van Guinee ontplooi het, het hy die Nasionale Vergadering (NV) daaroor ingelig.
Die Grondwet vereis van die president om die parlement “vinnig” in te lig sodra die weermag ontplooi word.
Zuma het die parlement egter eers die afgelope week daaroor ingelig by wyse van ’n brief aan die speaker van die NV.
Die president het geskryf die weermag is ontplooi vir ’n “nood-ontruiming van Suid-Afrikaanse burgers, diplomate en hul gesinne uit die Ivoorkus”.
Daar was vroeër vanjaar ’n burgeroorlog in die Ivoorkus nadat ondersteuners van oudpres. Laurent Gbagbo nie die verkiesingsoorwinning van pres. Alassane Ouattara wou aanvaar nie.
“Die vlak van geweld wat gevolg het, het verskeie lande genoop om hul burgers uit die Ivoorkus te ontruim,” het Zuma gesê.
Altesaam 175 lede van die weermag was van 4 Januarie tot 28 Februarie daarby betrokke.
Zuma het nie gesê hoekom hy die parlement nie vroeër oor die ontplooiing ingelig het nie.
Mac Maharaj, die president se woordvoerder, het navrae na die departement van verdediging verwys, “want ek weet niks van die saak nie”.
Teen druktyd het die departement nog nie op vrae gereageer nie.
Dit is nie die eerste keer dat Zuma die weermag ontplooi sonder om die parlement daaroor in te lig nie.
Die weermag is ook tussen 5 Januarie en 22 Februarie in Uganda ontplooi om burgerlikes te verwyder. Zuma het die parlement eers op 5 September daaroor ingelig.
Piet Pretorius, DA-woordvoerder oor openbare werke, het gesê die president het ook nie aan die Verdedigingswet van 2002 voldoen nie.
Art. 18(4) lui dat enige uitgawes wat spruit uit die ontplooiing van die weermag aan die NV verklaar moet word.
– Volg Nuus24 op Twitter
- Die Burger