Zuma-spotprent is vulgêr, sê AfriForum

2012-07-10 08:45

Johannesburg – Die burgerregtegroep AfriForum sê Zapiro se nuutste spotprent is ‘n “vulgêre” uitbeelding van pres. Jacob Zuma.

Die spotprent, wat verlede week in Mail & Guardian gepubliseer is, beeld die president as ‘n manlike geslagsorgaan met ‘n stortkop uit.

Ernst Roets, adjunk- uitvoerende hoof van die organisasie, sê die tekening is in swak smaak en dra nie by om ‘n oplossing vir Suid-Afrika se probleme te vind nie, het die SABC berig.

“Alhoewel AfriForum 'n groot voorstaander van vryheid van spraak en van die bevordering van ‘n vrye pers en vryheid van artistieke uitdrukking is, is hierdie ook 'n kwessie van menswaardigheid,” het Roets in ‘n mediaverklaring gesê.

Roets het bygevoeg dat Zapiro genoeg rede het om geldige kritiek op die regering en selfs die president te lewer, maar ‘n aanbeveling gemaak dat kunstenaars die invloed en moontlike gevolge van hulle kunswerke moet evalueer voordat hulle dit aan die publiek bekendstel.

Volg Nuus24 op Twitter