Zuma-smeer was 'politieke stelling'

2012-05-23 12:06

Johannesburg – Die vandalisering van die omstrede kunswerk van pres. Jacob Zuma was ‘n politieke stelling, het een van die twee mans wat daarvan aangekla word dat hulle die kunswerk beskadig het, in die Johannesburgse streekhof gesê.

“Dit was my bederfde stembrief,” het Barend la Grange (58) Woensdagoggend gesê terwyl hy gewag het om op aanklag van opsetlike skade aan eiendom te verskyn.

Hy het na bewering twee groot kruise oor Brett Murray se The Spear in die Goodman-galery in Johannesburg getrek.

La Grange sê hy ken nie Louis Mabokela, die ander man wat daarvan beskuldig word dat hy swart verf oor die skildery gesmeer het, nie.

La Grange sê hy het Mabokela eers ontmoet nadat hulle albei in hegtenis geneem is.

Hy sê dit gaan nie oor kuns nie, maar is eerder ‘n politieke kwessie wat nou ‘n kwessie van ras geword het. Die man sê hy sal later oor sy aksies uitbrei.

George Moyo het vroeër in die Hillbrow-landdroshof verskyn nadat hy na bewering probeer het om “respect” op die galery se muur te spuit.

Moyo het by die Johannesburgse streekhof opgedaag om sy ondersteuning aan die twee mans te toon.

Volg Nuus24 op Twitter 

- SAPA