Zuma sloer met munisipale wet
2011-06-01 07:51
Kaapstad – Pres. Jacob Zuma sloer al 43 dae om die wetsontwerp te onderteken waarkragtens vakkundigheid in munisipaliteite afgedwing moet word en partypolitieke ampsdraers verbied word om in senior munisipale poste te dien.
’n Hooggeplaaste in die departement van samewerkende regering het gesê hulle het gehoop Zuma sou die Wysigingswetsontwerp op Munisipale Stelsels vóór die plaaslike verkiesing promulgeer.
Die wet is noodsaaklik om munisipaliteite reg te ruk en die departement wou dit op die wetboek gehad het voordat die nuwe raadslede en burgemeesters beëdig word.
Die parlement het dié wetsontwerp, wat ook bepaal dat korrupte munisipale amptenare se name vir ’n dekade op ’n swartlys geplaas word en dat senior munisipale bestuurders toepaslik gekwalifiseerd moet wees, reeds op 19 April goedgekeur en na die presidensie verwys.
Nathi Mthethwa, waarnemende minister van samewerkende regering, en Yunus Carrim, adjunkminister, het Dinsdag op ’n inligtingsessie by die parlement klei getrap oor vrae oor wat die oponthoud veroorsaak.
Die munisipale vakbond Samwu is teen die wetsontwerp gekant en het gister by navraag gedreig om landwyd te staak indien Zuma dit onderteken. “Ons het reeds ’n aanduiding van die president gekry dat hy dit nie sal onderteken nie. Dit moet terug parlement toe,” het Tahir Sema, Samwu se nasionale woordvoerder, gesê.
Volg Nuus24 op Twitter.
- Die Burger