Zuma se seun bevoordeel deur 'verdagte transaksie'
2010-08-15 10:00
Johannesburg - Die National Union of Mineworkers (NUM) het hul misnoeë uitgespreek oor die afgelope week se winsgewende transaksie tussen ArcelorMittal en Ayigobi, ’n swart-ekonomiesebemagtiging-groep (SEB).
Die NUM sê dit lyk asof regeringsbeleid gebruik word om ekonomiese deure oop te maak vir diegene met politieke konneksies.
Lesiba Seshoka, woordvoerder van die NUM, het gesê die R9 miljard-transaksie, ingevolge waarvan pres. Jacob Zuma se seun, Duduzane, bevoordeel word, is ’n teken dat swart ekonomiese bemagtiging steeds net ’n sekere groep mense bevoordeel, selfs ná die verandering van die ANC-bewind in Polokwane in 2007. ’n Ander bevoordeelde is die bekende sakeman Sandile Zungu, wat bande met die president het en die pro-ANC-koerant gaan finansier.
“Dit is ’n tenderpreneurskap van ’n spesiale soort, waarby regeringsbeleid gebruik word om deure oop te maak sodat dié met politieke bande eerste deur kan stap.”
Die grootste aandeel, 75% van die transaksie, gaan aan strategiese vennote, terwyl die res aan vennote gaan wat nog geïdentifiseer moet word. Personeel by ArcelorMittal sal ook 5% voordeel trek.
Die strategiese vennote is die 28-jarige Zuma wat die grootste gedeelte kry, Zungu (die tweede meeste), Gugu Mtshalo, vennoot van adj.pres. Kgalema, en die Gupta-familie, wat die regering se voorgenome koerant gaan ondersteun.
Die Guptas is Indiese burgers, so dit is tans onduidelik hoe hulle kwalifiseer as vennote in ’n transaksie wat gemik is op swart ekonomiese bemagtiging.
Uit die ANC se ekonomiesebeleid-dokument, wat volgende maand op die party se raadsvergadering in Durban bespreek sal word, blyk dit dat daar met die uitvoering van swart ekonomiese bemagtiging op die bemagtiging van swart beleggers gefokus word deur wit beheerde maatskappye te dwing om hul aandele aan hulle te verkoop.
Zwelinzima Vavi, hoofsekretaris van Cosatu, wou nie kommentaar lewer oor die Arcelor-Mittal-Ayigobi-transaksie nie, maar was wel vroeër krities oor ’n soortgelyke transaksie tussen Telkom en die Elephant Consortium. Hy het gesê dié R6,6 miljard-transaksie, wat deur die staatspensioenfonds gefinansier is, was die “ergste vorm van swart ekonomiese bemagtiging”.