Zuma se opmerking 'verkeerd verstaan'
2012-09-16 17:32
Johannesburg – Pres. Jacob Zuma se opmerking vroeër in die week oor die heersende meerderheid in ‘n demokrasie is “verkeerd opgeneem,” het die presidensie Sondag gesê.
“Pres. Zuma wil diegene wat bekommerd was oor die opmerking herinner dat Suid-Afrika ‘n grondwetlike demokrasie is en die regte van alle burgers word in die grondwet verseker,” het sy kantoor in ‘n verklaring gesê.
“Alle Suid-Afrikaners is gelyk, ongeag van kleur, ras of geloof.”
Die presidensie sê die Demokratiese Alliansie het Zuma se opmerking verkeerd opgeneem om dit te laat blyk die minderheid het minder regte. Dit is nie die geval nie, het sy kantoor gesê.
Zuma het ‘n fundamentele demokratiese beginsel genoem, dat terwyl alle lede van die samelewing opinies het, dra die wil van die meerderheid die dag.
“Dus is daar niks onvoorsiene of verkeerd in wat die president in sy antwoord op ‘n vraag oor vakbonde in Marikana tydens vrae in die parlement gesê het nie,” het die presidensie gesê.
Zuma het Donderdag aan die parlement gesê dat die meerderheid in beheer is in ‘n demokrasie.
“Jy het meer regte, want jy is ‘n meerderheid; jy het minder regte, want jy is ‘n minderheid. Dit is hoe demokrasie werk,” het hy gesê.
Lindiwe Mazibuko, parlementêre leier van die DA, het Sondag in ‘n verklaring die presidensie se opmerkings verwerp.
“Pres. Zuma het homself weer as gewys as iemand wat nie daarin slaag om die basiese pilare van ons grondwetlike demokrasie te verstaan nie...
“Hierdie is ‘n president wat nie glo die grondwet is bo die ANC nie. In sy kop is dit net daar om die ANC te dien,” het sy gesê.
– Volg Nuus24 op Twitter
- SAPA
