Zuma se nuwe MIV/Vigs-maatreëls
2009-12-01 13:41
Pretoria - Pres. Jacob Zuma sê alle pasiënte met TB of MIV/Vigs met CD4-telling, 'n maatstaf van die immuniteitstelsel se sterkte, wat 350 of minder is, sal voortaan antiretrovirale behandeling kry.
Dié aankondiging het Zuma Dinsdag tydens Wêreldvigsdag-vieringe in Pretoria gemaak.
Op die oomblik ontvang slegs mense met 'n CD4-telling onder 200 antiretrovirale behandeling.
Dié aankondiging is met luide toejuiging verwelkom.
"TB en MIV/Vigs sal nou onder een dak behandel word."
Zuma het gesê "uitsonderlike maatreëls" is nodig om die huidige neiging van die epidemie in die land om te keer.
Aaron Motsoaledi, minister van gesondheid, het verlede maand skokkende statistieke oor MIV/Vigs bekend gemaak. Hy blameer die vorige adminstrasie se stadige reaksie hiervoor.
– Sapa