Zuma sê nee vir SA se 23 000 briewe
2010-02-16 15:33
Kaapstad - Die presidensie het Dinsdag geweier om 23 000 briewe van Suid-Afrikaners wat bekommerd is oor misdaad, te aanvaar.
Dirk Hermann, adjunkhoof van Solidariteit, en twee ander lede was in die parlement om persoonlik dié briewe aan pres. Jacob Zuma te oorhandig.
Die trio het net ná 12:00 met kruiwaens by die parlement se besoekerssentrum opgedaag.
Hermann het aan die media gesê die presidensie het bevestig dat hulle die briewe by die besoekerssentrum sal ontvang.
Die groep is toe gesê om die briewe na Zuma se kantoor, Tuynhuys, op die parlement se perseel te neem.
Ná 'n lang gewag en talle oproepe het die polisie die trio beveel om alles terug te neem na die besoekerssentrum omdat dit nie deur sekuriteit geskandeer is nie.
Hier is toe aangekondig dat die presidensie weier om die briewe te aanvaar.
Hermann het gesê onder die omstandighede het hulle geen ander keuse as om die briewe op die trappe by die sentrum te los en te hoop dat die presidensie die briewe daar sal kom haal.
– Sapa