Zuma se lyfwagte dreig joernalis en fotograaf
2011-11-25 08:02
Bloemfontein – Skaars twee dae nadat die parlement die Wetsontwerp op die Beskerming van Staatsinligting goedgekeur het, is ’n Volksblad-verslaggewer en fotograaf deur lyfwagte van pres. Jacob Zuma uitgeskel en geïntimideer.
’n Vergadering van die ANC se nasionale uitvoerende komitee word dié naweek in Bloemfontein gehou en Zuma en adj.pres. Kgalema Motlanthe word vandag in die stad verwag. Verskeie ministers was gister al in die stad en talle blouligkonvooie het verkeer in Bloemfontein ontwrig.
Volksblad het verneem die hooggeplaastes sou by die Phillip Sanders-oord bymekaarkom en daarvandaan na verskeie bestemmings in en om Bloemfontein vertrek.
Een van die lyfwagte het reeds buite die oord se hek op die fotograaf geskree om op te hou foto’s neem. Die kavalkade en sowat tien verkeerspolisie-voertuie het toe na die Waaihoek- Weslyaanse kerk gejaag.
Daar het sowat ses lyfwagte op die verslaggewer en fotograaf toegesak en aangedring op die geheue-skyfie van die kamera.
“Wie het julle toestemming gegee om ons te volg?” het een van die lyfwagte geskree.
Nadat die verslaggewer geweier het om die geheue-skyfie te oorhandig, wou hulle die foto’s sien. Die foto’s moet alles uitgevee word, is gesê.
“Wie is julle, van watter koerant? Gee ons jou identifikasie-kaart.”
Hulle het toe ’n visite-kaartjie gevat en gesê: “Julle sal weer van ons hoor.”
Hulle het ook met inhegtenisneming gedreig en gesê: “Julle reis eindig hier. Julle volg ons nie”. Daarna het die konvooi weggejaag.
Geen hooggeplaaste was in enige van die motors nie.
Die NUK-vergadering word by die oord gehou en honderde polisielede, verkeersbeamptes en lyfwagte het reeds Donderdag by die oord saamgetrek.
Julius Malema, geskorste president van die ANC-jeugliga, sal ook die NUK-vergadering bywoon.
Die ANC se eeufeesviering- en leierskapskonferensie sal na verwagting hoog op die agenda wees.
Volg Nuus24 op Twitter
- Volksblad