Zuma sê hy sal Shaik-kwytskelding oorweeg
2012-01-23 08:00
Kaapstad – Pres. Jacob Zuma sal die veroordeelde bedrieër Schabir Shaik se aansoek om presidensiële kwytskelding oorweeg sodra hy dit ontvang.
Die departement van justisie verwerk nou die aansoek, het Tlali Tlali, departementele woordvoerder, gister gesê.
Shaik het in 2008 om presidensiële kwytskelding aansoek gedoen.
Die Sunday Independent het gister berig Shaik wil R2,5 miljoen – wat hy glo aan Zuma geleen het – terughê. Hy wil ook kwytskelding hê.
Shaik, Zuma se voormalige finansiële adviseur, is in 2005 altesaam 15 jaar tronkstraf opgelê. Hy is in 2009 op mediese parool geplaas nadat hy aan korrupsie en bedrog skuldig bevind is.
Luidens die berig voel Shaik of hy “gebruik” is.
“Noudat die Shaik-put droog is, is die Guptas die gunstelinge. Ek is gebruik en misbruik,” het die koerant hom aangehaal.
Shaik het blykbaar nog nooit van Zuma gehoor sedert hy president geword het nie, ondanks die feit dat hulle voorheen in “konstante kontak” was.
Die koerant berig hy het gesê hy is nooit die volle R2,5 miljoen – wat Zuma blykbaar hoofsaaklik vir die sorg van sy kinders, insluitend skoolgeld, gebruik het – terugbetaal nie. Net sowat R500 000 is na bewering terugbetaal.
Shaik het gister aanvanklik onderneem om ’n verklaring uit te reik, maar later van plan verander. Hy was net bereid om te sê: “Ek het geen kommentaar op dié kwessie wat verband hou met my persoonlike verhouding met die president, anders as dit wat deel van die hofdokumente vorm nie.
“Ek respekteer die president en verwag joernaliste sal dit ook doen.”
Die appèlhof lewer aanstaande maand uitspraak oor ’n aansoek van die DA om die besluit om Zuma se strafregtelike vervolging te staak, te betwis. Die destydse waarnemende nasionale direkteur van openbare vervolging, adv. Mokotedi Mpshe, het dié besluit in April 2009 geneem.
Die aanklagte het glo met Shaik se saak verband gehou.
Tlali het gesê die departement van justisie verwerk nou Shaik se aansoek om kwytskelding.
“Nadat ons dit verwerk het, word dit vir ’n besluit na die president gestuur. Daar is geen vasgestelde tyd vir die bekendmaking van die besluit nie.
“Ons sal alle pogings aanwend om elke aansoek so gou as moontlik te verwerk. Daar is ’n aansienlike aantal aansoeke in dié verband,” het Tlali gesê.
Reeves Parsee, Shaik se prokureur, asook Mac Maharaj, Zuma se woordvoerder, wou nie gister op die koerantberig reageer nie.
– Volg Nuus24 op Twitter.
- Die Burger