Zuma se hulplyn kos miljoene
2011-11-04 08:01
Kaapstad. – Pres. Jacob Zuma se hulplyn het belastingbetalers in twee jaar R37,5 miljoen gekos.
Collins Chabane, minister in die presidensie verantwoordelik vir prestasiemonitering en evaluasie, het in antwoord op ’n parlementêre vraag gesê R13,5miljoen is tussen September 2009 en September 2011 aan personeeluitgawes vir dié hulplyn bestee.
’n Bedrag van sowat R14 miljoen vir telekommunikasiedienste en dienste van die Staats- agentskap vir Inligtingstegnologie (Sita) is in die huidige boekjaar betaalbaar. Sita verskaf die inbelsentrumdienste.
Altesame 20 agente werk in die inbelsentrum. Hulle word bygestaan deur ondersteuningspersoneel wat oorsig en tegniese bystand verskaf.
Athol Trollip, DA-LP, wou in ’n geskrewe parlementêre vraag besonderhede oor die hulplyn by Chabane hê.
Oor die volume oproepe het Chabane gesê in die 12 maande tussen September 2009 en Desember 2010 is meer as 1miljoen oproepe deur die hulplyn geregistreer.
Bykans 500 000 oproepe is deur agente gehanteer en sowat 320 000 was opvolg-oproepe. Altesame 55 857 navrae is opgelos.
Volg Nuus24 op Twitter.
- Volksblad