‘Zuma se eerste ware toets kom’
2009-08-24 07:13
Philda Essop
Kaapstad – Pres. Jacob Zuma se hantering van die Donen-kommissieverslag is sy eerste ware toets, het die DA Saterdag gesê.
Dit sal boekdele spreek oor sy houding ten opsigte van korrupsie.
’n Berig in ’n Sondagkoerant wil dit hê dat adjunkpres. Kgalema Motlanthe glo luidens dié kommissieverslag bewus was van die sakeman Sandile Majali se “twyfelagtige olietransaksies” met die vorige Irakse bedeling.
Die Donen-kommissie van ondersoek is in 2006 deur oudpres. Thabo Mbeki aangestel ná beweerde ongerymdhede van Suid-Afrikaanse ondernemings in die Verenigde Nasies (VN) se olie-vir-voedselprojek in Irak.
Die verslag is nog nie bekend gemaak nie.
Die Sunday Times het Sondag berig Majali het blykbaar transaksies met Irak aangegaan op ’n wyse wat VN-sanksies teen die vorige Irakse leier, oudpres. Saddam Hoesein, oortree het.
Die berig sê die kommissie het ook die rol van Tokyo Sexwale, minister van huisvesting, ondersoek.
Die berig sê ook Sexwale was onbewus van ’n sogenaamde “byheffing”.
Mocoh – ’n buitelandse entiteit waarin Sexwale ’n mede-direkteur was –“het verpligtinge aangegaan” om byheffings te betaal, terwyl dit olietransaksies met Irak onderhandel het.
Alle inkomste uit Irak se olieverkope was veronderstel om vir die uitsluitlike gebruik van humanitêre doelwitte na ’n spesiale VN-gemoniteerde rekening te gaan.
Die Irakse regering het blykbaar byheffings van 10% op alle verkope geplaas en geëis dit moet in staatsrekeninge betaal word.
Ian Davidson, DA-hoofsweep, sê in ’n verklaring die Sunday Times se berig is baie problematies omdat dit die verslag “selektief” aanhaal en versuim om enige van die inligting wat dit onthul in sy “volle en behoorlike” konteks te plaas.
Nietemin glo die DA Zuma maak die volledige verslag bekend.
“Pres. Zuma praat herhaaldelik van die regering se verbintenis tot deursigtigheid.
“Nou moet woorde gevolg word deur optrede. Ons versoek die president om die volle Donen-kommissie-verslag bekend te maak, en om weer ’n kommissie van ondersoek aan te stel wat die mag het om die kwessie behoorlik te ondersoek.”
Davidson sê ’n regter moet só ’n kommissie lei en die mag hê om getuies te dagvaar.
Vincent Magwenya, presidensiële woordvoerder, het gister gesê hy kan nie in dié stadium kommentaar lewer nie.
- Die Burger