Zuma se belange ingehandig
2010-03-10 17:15
Johannesburg – Pres. Jacob Zuma het Woensdag 'n verklaring rondom sy finansiële belange ingehandig, het sy advokaat, Michael Hulley, gesê.
“Pres. Zuma het vandag ‘n lys aan die sekretaris van die kabinet oorhandig waarin alle geskenke, voordele of enige finansiële belange wat deur hom of sy familie besit word of ontvang is, verklaar word,” het hy in ‘n verklaring gesê.
Volgens Hulley stryk die verklaring met die vereistes van die Wet op die Etiek van Lede van die Uitvoerende Gesag van 1998.
Die stap volg op uitlatings dat Zuma nie sy finansiële belange binne 60 dae nadat hy as president verkies is, verklaar het soos wat die wet vereis nie.
“Rakende die besluit oor of hy geskenke moet aanvaar, het die president dieselfde etiese standaarde gehandhaaf as wat enige ander lid van die regering se top amptenare sou.
“In ieder geval, terwyl hierdie gebare baie waardeer word en van sentimentele waarde is, is geen van die geskenke van merkwaardige finansiële waarde nie.
Hulley het verder verseker dat die president "nie ‘n direkteur, lid of aandelehouer in enige maatskappy, publieke of privaat is nie" en dat hy nie met enige maatskappy geassosieer word nie.
- Sapa