‘Zuma se 20ste wys hy vergeet verskoning’
2010-02-01 07:48
Susan Cilliers
Johannesburg - Die onthulling gister dat pres. Jacob Zuma se 20ste kind glo verlede jaar gebore is, wys hy het al “vergeet” hy het vroeër verskoning gevra omdat hy onbeskermde seks gehad het.
Helen Zille, DA-leier, het so gereageer in ’n persverklaring wat gister uitgereik is ná ’n berig in die Sunday Times dat Zuma ’n kind verwek het by Sonono Khoza (39), dogter van Irvin Khoza.
Laasgenoemde is voorsitter van die plaaslike reëlingskomitee vir die Wêreldbeker-sokkertoernooi en ’n jare lange vriend van Zuma.
“Zuma se optrede weerspreek die regering se veldtog teen meer as een seksmaat en die risiko om met vigs besmet te word indien jy onbeskermde seks het,” het Zille gister gesê.
Sy het verwys na die groot nasionale advertensieveldtog OneLove op radio, televisie en in die gedrukte media wat onder meer die volgende aanmoedig: veilige seks, die gebruik van kondome en ’n lewensingesteldheid wat die kanse verminder op onbeskermde seks met meer as een maat.
“Die president se optrede staan in sterk kontras hiermee,” het Zille gesê.
Die Sunday Times het gister berig me. Khoza se dogter is op 8 Oktober verlede jaar gebore.
’n Afvaardiging van KwaZulu-Natal het glo in Desember verlede jaar namens Zuma met die Khoza-familie beraadslaag oor skadevergoeding ingevolge die Zoeloe-tradisie wanneer ’n kind buite die eg gebore word.
Die tonge het glo ook geklap toe Zuma volgens dié koerant op 17 Januarie vanjaar besoek gaan aflê het by die Khoza’s se herehuis in Soweto.
Die geskeide Khoza is glo ’n bestuurder by die bemarkingsafdeling van ABSA se Johannesburgse hoofkantoor.
Zille het in haar persverklaring verwys na uitsprake wat Zuma in 2006 gemaak het nadat hy onskuldig bevind is aan verkragting.
“Ek het onbeskermde seks gehad...
“Ek moes van beter geweet het. Ek moes meer verantwoordelik opgetree het,” het Zuma toe volgens Zille gesê.
Ook die Sunday Times het na dié vroeëre uitspraak verwys.
“Die jongste Zuma-kind wys die president het wéér onbeskermde seks gehad met ’n vrou met wie hy nie getroud is nie – iets waaroor hy drie-en-’n-half jaar gelede verskoning gevra het,” het die koerant gister berig.
Zille het in haar persverklaring gesê “dis duidelik dat hy (Zuma) nou vergeet het van sy (vroeëre) erkenning dat hy gefouteer het deur onbeskermde seks te hê.”
“Hy het weer eens daarin geslaag om die verkeerde boodskap na Suid-Afrikaners uit te stuur,” was Zille se kommentaar.
- Die Burger