Zuma sal my nie stilmaak – Malema

2012-09-19 07:17

Johannesburg – Julius Malema, voormalige leier van die ANC-jeugliga, het gesê hy sal nooit stilgemaak word nie en word nie geïntimideer deur die regering se pogings om dit te doen nie, berig Eyewitness News.

Malema het Dinsdag die media in Sandton toegespreek nadat hy verbied is om mynwerkers by Lonmin se Marikana-myn in die Noordwes toe te spreek.

Die mynwerkers het Dinsdag 'n ooreekoms met die mynbestuur bereik.

Malema het aan die media gesê president Jacob Zuma se "militêre" leierskapstyl sal hom nie keer om vir die armes te veg nie.

"Wat is 'n onwettige byeenkoms in 'n post-apartheid-Suid-Afrika? Dit het te ver gegaan. Diktatorskap kry nou vinnig momentum."

Maandag het die polisie Malema by die hek van die Wonderkop-stadion voorgekeer, waar die werkers vergader het vir die inligtingsessie. Ná ‘n lang gesprek het Malema weggery en hy is deur sowat 10 polisievoertuie vergesel.

‘n Polisiehelikopter het bo die konvooi gevlieg en polisielede het na verskillende ingangspunte gegaan om Malema te keer indien hy sou terugkeer.

– Lees meer hier

– Volg Nuus24 op Twitter