Zuma-saak teen Media24 hervat
2013-01-25 13:05
Johannesburg – Pres. Jacob Zuma se naamskeningsaak teen Tim du Plessis, 'n voormalige redakteur van Rapport, is vandeesweek in die hof hervat.
The Star berig Zuma eis R5 miljoen oor 'n foto wat in Desember 2007 in Rapport verskyn het. In dié foto braai Zuma saam met die sanger Steve Hofmeyr en die komediant Leon Schuster.
Die saak is vandeesweek in die Wes-Kaapse hooggeregshof aangehoor.
Die teks bo-aan die foto het gelui: ""Piekniek by Dingaan".
Zuma het die eis in 2010 ingedien en beweer die bedoeling was dat hy 'n persoon soos die Zoeloe-koning, Dingaan is. Dié Zoeloe-koning het gemaak asof hy met die Afrikaners bevriend wil wees, terwyl hy eintlik beplan het om hulle dood te maak.
Die verweerders – Media24 en Du Plessis – het in hofdokumente ontken dat dit hul bedoeling was om Zuma in daardie lig uit te beeld.
Hulle voer aan dat die redelike Rapport-leser sou verstaan het dat dit 'n speelse verwysing is na die Dingaan-voorval, of na 'n satiriese kabaret uit 1998 van Koos Kombuis en Johannes Kerkorrel, of albei.
Zuma het in Oktober 2012 'n naamskendingseis oor die "Raping justice”-spotprent teen Jonathan "Zapiro" Shapiro en The Sunday Times teruggetrek. Zuma het R5 miljoen van hulle geëis.
Die presidensie het toe gesê hy voel dat die howe nie altyd die beste plekke is om dié kwessies uit te sorteer nie, en bygevoeg dat daar dringende ekonomiese en politieke kwessies is wat die president se aandag verg.
– Volg Nuus24 op Twitter
- SAPA
