Zuma-regsman wil nie sê oor opnames
2011-09-29 07:03
Johannesburg – As dit van pres. Jacob Zuma se prokureur afhang, sal Suid-Afrika nooit weet hoe ’n stel geheime bandopnames in die hande van die president se regspan beland het nie.
Michael Hulley, Zuma se prokureur, het Woensdag gesê hy hou vol dat hy in sy kliënt se belang nié die omstrede stel bandopnames se oorsprong sal bekendmaak nie.
“Ek kan dit nie openbaar maak nie, selfs al dink jy dit is in openbare belang, ek is verbind daartoe om dit geheim te hou.”
Die Kommissie vir Versoening, Bemiddeling en Arbitrasie (KVBA) het eergister die bandopnames onwettig verklaar in ’n arbeidsgeding tussen adv. Willie Hofmeyr, hoof van die spesiale ondersoekeenheid (SOE), en Faiek Davids, sy voormalige adjunk. Hofmeyr het gevra dat die bande toegelaat word.
Dié bandopnames was deurslaggewend in die nasionale vervolgingsgesag (NVG) se besluit om korrupsieklagtes teen Zuma te laat vaar.
Die Nasionale Intelligensie-agentskap (NIA) het die opnames gemaak deur adv. Leonard McCarthy, destydse hoof van die Skerpioene, se gesprekke met onder andere adv. Bulelani Ngcuka, gewese direkteur van nasionale vervolging, af te luister.
Davids is in November 2010 in die pad gesteek nadat Hofmeyr vertroue in hom verloor het weens ’n gesprek tussen Davids en McCarthy op een van die bandopnames.
Die KVBA het in sy uitspraak gesê vir dié spesifieke geding is die bandopnames “onwettig en ontoelaatbaar”.
Die redes hiervoor is dat die SOE nie in besit is van die opnames nie en dit “ten spyte van sy beste pogings” nie in die hande kon kry om as bewys in die hof te dien nie.
Hofmeyr, die NIA en die NVG ontken dat die opnames in hul besit is en volgens die NIA is Hulley die enigste persoon wat in besit is van die volledige opnames.
– Volg Nuus24 op Twitter
- Beeld
