Zuma praat glo met Malema
2010-03-13 09:35
Sarel van der Walt, Die Burger
Pretoria - Pres. Jacob Zuma sou gister self met Julius Malema, leier van die ANC se jeugliga, praat oor die omstrede uitlatings wat hy vandeesweek gemaak het.
Hy sal ook die nasionale uitvoerende komitee van die ANC vra om Malema se uitlatings op sy vergadering dié naweek te bespreek, het Zuma hier aan ’n groep Afrikanerleiers gesê.
Malema het vandeesweek tot die groot ontsteltenis van baie mense onder meer ’n opruiende liedjie “Skiet die Boere, hulle is verkragters!” by ’n studentesaamtrek by die Universiteit van Johannesburg (UJ) gesing.
Gwede Mantashe, ANC-sekretaris-generaal, het gister aan Eyewitness News gesê die party sal Malema nie betig nie.
“Daardie liedjies is deel van ons geskiedenis en ons gaan nie gedwing word om daardie geskiedenis uit te wis nie.”
By die UJ-geleentheid het Malema me. Helen Zille, DA-leier, ook ’n satanis genoem.
Met verwysing na vrese wat op Zuma se vergadering met Afrikaners oor Malema geopper is, het die presidensie in ’n verklaring gesê die ANC en die regering bly getrou aan die strewe na nie-rassigheid.
“Zuma bly verbind tot die stryd teen alle vorme van rassisme, seksisme en onverdraagsaamheid.”
Altesame 24 Afrikaners, onder wie sakelui, boere en die Springbokslot Victor Matfield, het Zuma eergisteraand by die presidensiële gastehuis in Pretoria ontmoet.
- Die Burger