Zuma-nommer ‘hou SA aan lyntjie’
2009-12-03 06:48
Heindrich Wyngaard
Kaapstad - Pres. Jacob Zuma se hulplyn – een van sy vlagskip-“omgeeprojekte” – ontaard in ’n groot verleentheid vir sy regering.
Dit kom nie die mas op met die aantal oproepe wat ontvang word nie – en staatsdepartemente en die provinsies is boonop traag om klagtes op te volg.
Gister het dit aan die lig gekom dat staatsdepartemente en provinsies die afgelope drie maande onderskeidelik aan net 33% en 18% van alle klagtes aandag gegee het.
Zuma het nou alle ministers en premiers opdrag gegee om onmiddellik met ’n omdraai-strategie vorendag te kom, het die presidensie gesê.
Collins Chabane, minister verantwoordelik vir prestasiemonitering en evaluering, het ook bekend gemaak dat ’n skamele 9 190 van die altesaam 30 650 klagtes wat tot 27 November ontvang is, tot dusver opgelos is.
“Die presidensiële hulplyn is nie tans in staat om die aantal oproepe wat ontvang word te hanteer nie,” het Chabane in antwoord op ’n parlementêre vraag van Joe McGluwa van die OD gesê.
Selfs al sou die aantal operateurs vermeerder word, sal dit slegs ’n beperkte impak hê, aangesien hulpbronne beperk is, het Chabane bygevoeg.
Die hulplyn is middel September deur Zuma self – en teen ’n koste van R1 miljoen vir die eerste jaar – bekend gestel. Die eerste kwartaallikse verslag, wat gister uitgereik is, wys dat die meeste klagtes uit KwaZulu-Natal (4 002) ontvang is. Dan volg Gauteng (3 166) en die Oos-Kaap (1 582).
Die meeste oproepe – 3 074 – is na die departement van arbeid verwys, waarvan 1 915 aandag geniet het.
Slegs 323 van die 2 321 klagtes wat na die departement van huisvesting verwys is, is bygelê, terwyl die departement van binnelandse sake aan 1 380 uit altesaam 1 946 klagtes aandag gegee het.
Athol Trollip, parlementêre leier van die DA, het gesê dit is ironies dat Chabane “nou eers agterkom wat ons al lankal sê: dat daar groot probleme met die hulplyn is”.
Zuma se kantoor het gister benadruk dat die eerste jaar van die projek as ’n loodsfase beskou word. Die opgewondenheid van mense wie se klagtes aandag geniet, bring groot bemoediging.
- Die Burger